’t Is maar wat in disse stad

Zakt in de geute, soms is de gemeenteroad onnavolgbaar, neem now de mosie van de VVD, D66, en Gruunlinks ,die weg e stemt is met de vroage um alleent maar ies opni’j te goan noa denkn over de lokasie Sonnenbargkwartier in Iesselmuudn die in twee duzend zeum an e weezn is um d’r een karreke te bouwn.

We bin inmiddels dartien joar varder, d’r is vardes niks gebeurt, en de wereld is in die dartien joar behoorli’jk veranderd, ’t is een lokasie in ’t centrum van ’t dorp woar toen miskien niet, maar woar op dit moment roazend behoefte is an senioren ‘uuzn.

En aj die behoefte willn inlossn dan muj toch op zuuk noa een lokasie veur die ‘uuzn, woarumme dan niet onderzuukn of d’r gien andere lokasie veur een ni’je karreke is, die uuteindeli’jk ook wel een entien buutn ’t centrum e bouwd kan worrn.

Ik warpe varre van mien dat ik die karreke gien plekkien zol gunn, maar maak in ieder geval noa dartien joar een ni’je ofweging, en loat wat ‘t zwoarste is ’t zwoarste weegn. Onbegriepeli’jk det lokale peti’jn zoas GBK en Kampen Sociaal, zich ‘ier niet bi’j an en sleutn em, maar doar zal ongetwiefeld een politieke reedn achter skuul goan.

Det de waarn markt an verandering onder ‘eevig is is dudeli’jk, en det is niet alleent in kampen det is overal en veule breder an de orde, en det geldt netzo veur een antal winkels, kiek maar in de Oldestroate.

D’r wordt al joarn e steggelt over de opzet van de moandagmarkt, en wie d’r regelmatig kump die kan met eigen oogn zien det die markt met ’t joar kleiner wordt, nog eem en ei’j past elemoale op de Ni’jemarkt.

Niemand kan in de toekomst kiekn, maar aj veurspelln (um in vaktarm te bliem) det de non foodsector, alles wat aj niet kunn eetn, steeds kleiner wordt, en in de praktijk is det zo, dan zal uuteindeli’jk de foodsector, alles wat aj wel kunn eetn, overbliem, de wereld veranderd, en ’t koopgedrag van de consument veranderd net zo ‘ard, det kuj niet teegn oaln, jammer maar ’t is niet anders

Vrogger was ‘t Henk van Warven die tachtig kroam zettn, now staon d’r nog een ántien vol en de rest van de kooplui stiet met eigen verkoopwagens.

Maar goed de wet’older ef toe e zegd det ie d’r andacht an zal skenkn, en boomdien zal een commissie uut de road zich ook over dit probleem goan buugn, we zien wel wat ’t wordt.

En alweer is d’r een joar veurbi’j, ‘t liekt wel of ’t steeds vlugger giet, zo is ’t januari en zo is ’t weer december, volgend wiekend alweer veur de twintigste keer “kerst in oud Campen”. Pette of veur Jan Lieftink en Gerry Kragt de driemde kracht achter al die vri’jwilligers die det prachtige evenement mogeli’jk maakn. ’t enige die roet in ’t eetn kan gooien is ’t weer, maar det em we now één keer niet in de ánd, en zeker niet in december, ‘oe dan ook geniet ‘r saamt van.

Ik wense jullie allemoale ook namens Derk de Vuurpiepe en Femme Knup in ’t Emp een veilig uutende, en veul ‘eil en zeegn in twee duzend en twintig, en vergeet veural niet d’r is altied wel wat in disse stad.

Appien Floep