’t Is maar wat in disse stad

Zakt in de geute, Kampen cultuur stad, wat kunn we an de ene kante toch merakels trots weezn op onze plaaseli’jke muziek verenigingn, de ene noa de andere kump met een eerste pries tuus van een festival of een wedstrijd. Maar an de andere kante bin d’r toch ook een paar die muuite em um op stroate te verskienn. Ik wete det ’t woord fusie veur een kladde muzikantn nog altied een woord is woar ze maar liever niet over proatn, maar of ze d’r in de toekomst an ontkoom, ik betwiefele ‘t.

Kreeg ik gisteren een telefeuntien van ene van de jonges van de stichting kadekraan Kampen, die krane die ‘onderd joar an de Iesselkante e stoan ef, die kunn eindeli’jk varder want ze kriegn van de gemeente ’t geld van de rekening veur de umgevings vergunning terug, vestzak broekzak nuumm ze det. Maar det ad wel eel wat voetn in de aarde, want ze waarn van plan um de krane as blievende ‘erinnering an de Ánzedaagn twee duzend zeumtiene klaor te em ,en det ad best e kunt, en now vrog de burgemeester of det niet alsnog ‘aalbaar is. Maar ik denke det ie zelf maar ies eem in de spiegel mut kiekn, eij wist d’r al ‘eel lange van en now is ie te late, want ik denke niet det det nog ‘aalbaar is, jammer.

Teegn de wil van een roadsmeerder’eid, wat ik niet elemoale begriepe, want ze roepn al joarn det ze noa een autoluwe binnenstad willn ,maar ze em nog nooit de knuppe deur e ‘akt. Ef ’t college toch de konte veur de kribbe e gooid, en besleutn det de stadsbrugge twee weekn allenig vanuut Iesselmuudn noa de stad toe beskikbaar is, anders umme bi’j verplicht um via de meuln brugge de stad uut te goan. D’r is een bult comosie en onbegrip over, maar an de andere kante bin ik toch ook wel arg beni’jd oe de verkeers stroom zich giet ontwikkeln.

Van een antal bewoners van de Iesselkante ek begreepn det ze de vlagge uutsteekn, want doar zittn ze iedere middag in de stank van de uutloat gassn. Ik ‘eb mien loatn vertelln det ze somers raamm en deurn dichte muttn oaln want ze stinkn ‘t ‘uus uut. En as de brugge een bietien vake op giet dan stoan ze met dreiende motor tot varre veurbi’j de koornmarkts poorte. Ze kunn mien niet wies maakn det det goed is veur de gezond’eid van de mensen an de Iesselkante. Maar of de road doar begrip veur ef, wordt in ieder geval vervolgd. Pette of veur de stichting stads herstel, ze em zich in e zet um de vijf olde dakkapelln die tot now toe van hot noa her e sleept bin te be’oaln, en det is gelukt ze stoan in de openbare binn tuin van Margaretha, de muuite weert um ies te goan kiekn. D’r is ook al ies een poging e doan um ze terug te plaasn op ’t veurmalige gebouw van de nutsbedri’jvn achter de boom karke, maar de constructie van ‘t dak bleek niet stark genog. Maar eind goed al goed ze em een prachtig plekkien e kreegn.

Nog een paar weekn dan ’t is vekansie tied, eem de knoppe op uut en eem de accu bi’j laadn, en aj weerumme bin is één ding zeker, d’r is altied wel wat in disse stad.

Appien Floep