’t Is maar wat in disse stad

"Zakt in de geute, veur de zoveulste keer trammelant um Boom aamt stroate veertiene. En wie de politiek een bietien volgt en e volgt ef die wet det de road verskillende keern in meerder’eid beslist ef det ’t pand e restaureert mos worrn. Nee nog starker, wet’older GaitJan Velthoen ef in januari twee duzend twaalf e zegd, ie kunn van mien op an, veur de vakantie dan ek de plann rond. Maar ei’j ef d’r niet bi’j e zegd veur welke vakantie. Det de kloof tussn burgers en politiek allenig maar groter wordt is te dankn an det eeuwege gedrei van die politici. De verloedering van det pand is gebeurt in de tied det de gemeente eigenaar was, en um van de ellende en van de verantwoordeli’jk éid of te weezn, is de boel verkocht aan Mateboer .En as die beslist um te sloopn dan is Velthoen de lachende darde, want dan ‘oeft ef ei’j die beslissing niet te neemm, wast ie zien ‘andn in onskuld. De burgers muttn kunn uutgoan van een betrouwbare over éid, en det kan dus kenneli’jk niet. En dit is niet de eerste keer det Velthoen een andere kante opgiet dan wat de road anvankeli’jk wil. Maar ook de road giet niet vri’j uut, die loatn ook alles maar over ‘un kante goan. Ik wil ze niet allemoale over ene kamme skeern want d’r bin ook ele goeie roadsleedn. Maar, en det valt mien veural in disse roads periode op, d’r bin d’r bi’j die nooit in debat goan en zonder ook maar noa enig argument van een ander te luustern loat stoan te reageern, een veur ingeneum standpunt inneem, en as een untien an touw achter un wet’older an loopn. En wat mien ook nog eem van mien Kamper ‘arte mut, as dan een roadslid vrog, maar d’r mut toch eerst nog een sloop vergunning verleent worrn, det Mateboer dan zeg, lekker puh, die zit al in de umgevings vergunning, uut e proat bi’j.

Nog zo’n raar ver áal, wie ‘aalt ’t now in zien ‘eufd um met ’t veurstel te koomm um de ofslag op de Zwolsweg richting Kampen centrum op te ‘effn. ’t Is te gek veur woordn, nader ie van de mooiste kante Kampen, maj d’r niet in, zo jaag nog meer mensen langs Kampen ene. Aj now willn proatn van een ni’je Kamper ui, dan is dit d’r ene in optima forma, ’t zal toch niet woar weezn det de road ook ‘ier gien weerwoord op ‘ef.

En dan tot slot de veurgestelde pachtgeld ver’ooging van een fors bedrag veur de pachters van ‘t Kamper eiland, college benader det ies van een andere kante, ie pakkn ze een fors bedrag van ‘un inkoomm of, zo kuj ’t ook zien, en det is onverantwoord. As ze det zelfde bedrag van oe eign inkoomm zolln ofpakkn dan is Kampen te klein.

Toch blef mien glas altied ‘alf vol, en ik blieve ook volgend joar gebruuk maakn van mien informantn Derk de Vuurpiepe en Femme Knup in ‘t ‘emp, veur wie deurn los goan die veur mien gesleutn bliemm, um ’t politieke theater in Kampen een bietien te volgn.

Ik wense jullie allemoale veul ‘eil en zeegn veur twee duzend zeumtiene, en vergeet niet d’r is altied wel wat in disse stad."

Appien Floep.