Kamper Kruudmoes: Sluusien

· leestijd 4 minuten Algemeen

(door Henk de Koning)

De ni’jjeurswisselink zit er weer op. De kruutdamp van ‘et melkbus-skietn verneem ie nog wel, maar allemoale eemm een neuze vol en ie bin er zo deur’ene. Bi’j al ‘et slechte ni’js lut 2016 ons ook een kladde mooie gebeurtenissen noa. In bizunder de wedergeboorte van de olde Van Heutszkazarne. Die veranderen van een machtig old soldoaten-bolwark in een skitterende medarne ‘uusvestink veur een kladde plaaselukke veurzieninks.

Zoas de hopenbare bibliotheek, een weer een zelfstandig toeristisch informasiekantoor en medarne studio’s veur de plaaselukke radio en tillevisie. Pette of veur ‘et gemeentebestuur det er an meewarken det een machtig bouwwark veur Kampm bewaard bleef. Spietig dan ook van de wel arrug rappe ofbraak van een uut 1870 ofkumstig keersluusienm, bi’j toeval ‘evunden bi’j graafwark veur de bouw van een parkeerdek an de Noordweg. Een klassiek veurbeeld van de vroggere sluus-en stuwbouw in ons land en deurumme niet enkelt van belang veur Kampm.

De stichting ‘Be’olt Arfgoed Brunnepe’, de stichting ‘Stads’erstel Kampm’ en de stichting ‘Istorische Sluuzen Nederland,’ hadviseern de gemeente dan ook zich in te zetn veur ‘et be’old van ‘et bekant 150 jeur olde waterbouwkundig monnument. ‘Al mut de onderste stene boomm koomm,’ wier er nog bi’j‘ezegd, er niet van uutgoande det de gemeente die roadgevink ook letterluk zol opvatn. Want ‘et sluusien wier inderdoad binn de kurtste keern tut an de underste stene of’ebreukn. In een veur de over’eid uutzunderlukke recordtied van ene weke! Enkelt een plaaselukke ondernemer zag nog wel toekomst in ‘et sluusien deur van de brokstukn plakkies te zaagn en die met: ‘Groetn uut Kampm, stuk van een stad!’ een toeristische bestemming te geemm. ‘Ook een maniere umme Kampm as monnementenstad te promootn,’ vun Jannus Flapuut. De bouw van ‘et parkeerdek vlotn eerst nog veurspoedig. Maar al rap gink ‘et geheid mis. De ‘uuzen in de ummegevink skeurn deur de vuus te zweure trillinks van ‘et heien. ‘Em ze bi’j jullie soms ook gas ‘evunden? informeern een toerist uut Grunningen, die bi’j de bouwput een bekende lucht opsnoeven. Dark Toestebolte vertul ‘em over de gasfabriek die vrogger op die plekke ‘ad ‘estoan. Nee, de anleg van ‘et parkeerdek is duudeluk niet onder een gelukkig gesteernte geboorn.

‘t Begun al met de vondst van det sluusien. Een drama met as starke rolbezettink: de borgemeester, twee’wet’olders en een stadsarcheoloog!’ Project-wet’older Geert Meijering kwam as eerste metene al stark op met zien tekst: ‘To bee or not to bee...!’ Vri’j vertaald in ‘t Kampers: ‘Wel een sluusien, niet een sluusien...’ Normaal bi’j dargelukke bodemvondsten giet onze gemeente in overleg met de archeologische dienst van Zwolle. Met de experts deur is det zo of’eproat. De Blauwvingers graamm nameluk dieper. Ook disse keer wier de Zwolse archeologen de vroage veur’elegd: ‘Wel een sluusien umme bewaarn, of niet een sluusien umme bewaarn?’ Met det verskil det de Zwolsen al binn ene dag moszen beslissen. ‘Maar die tied is veur dargeluk onderzuuk vuus te kurt. Zekers a’j ook nog mutn graamm in de vervuilde grond van een veurmalige gasfebriek.,’ zo melden mien de Zwolse archeologen. ‘Lut de Kamper archeoloog ‘et deurumme zelf maar uutzuukn.’

Maar Alexander Jager was druk an ‘t ver’uuzen en een mense kan maar één dink tegeliekke, wi’j gien fouten maakn. ‘Gien nood,’ dacht Alexander dan besteed ik det muujlukke wark wel uut an ‘et onderzuuksburo ‘Econsultancy’; een particuier bedrijf veur speciaal bodemonderzuuk. Kost een paar centen, maar dan ei’j ook wat. Intussen zat ook de sosjale media niet stille. Ook Projek-wet’older Geert Meijering vernam teems uut die bron det bi’j graafwark an de Noordweg mogeluk wat ‘eel bizunders was boomm ‘ekoomm. Maar bodemvondsten in de gemeente ‘eurn op ‘et burdtien van monnumenten-wet’older Martin Ekker en dus truk Meijering bi’j die an de belle. Maar Ekker zol net met vekansie. En met vekansie goan wil zègn koffers pakn en zo’n old sluusien lup niet weg. Trouwens lag deur niet de meldingk van stadsacheoloog Alexander, weurin die verzekeren det ‘et pas ontdekte ‘natte kunstwark’ best wel ies van ‘istorische weerde veur gans ‘et land kon wezen, maar niet veur Kampm. Ook al ‘ad ‘et sluusien in ‘et verleden nog zo’n belangrieke rolle ‘espeuld in de ontwikkeling van de stad. ‘Ik begrieppe det best,’ sprak Gait van ’t Lange Ende.

‘A’j weetn det Kampm al over 500 monnementen beskikt mut ‘et ook ies een keertien genog wezen!’ Maar Ekker twiefelen. ’t Kwam ‘em as monnumenten-wet’older veur det archeologisch onderzuuk niet wil zègn zomaar wat anknoojen met een skuppien in de grond, maar wel degeluk wetenskappeluk underzuuk betekenen. Deurbi’j officieel beskarmd deur de wet Archeologisch Monnumentenzurg. ‘Det mos Geert Meijering toch ook wel weetn!’ Ekker wist wat ‘em te doen sting, veurzag ‘et skriemm van de antekening ‘Spoed!’en stuurn die liniaal rectum weerumme noa Meijering. Wie now ies ploagn? ‘De borgemeester!’ skeut ‘et Meijering te binn. ‘Die ef as’eugste gezagsdrager van de stad ook ‘archeologie’ in zien bestuurlukke portefullie. De borgemeester las de boodskap en deed wat ie altoos dut: glimlachen. ‘Archeologie? Maar deur ‘em wi’j stadsarcheoloog Alexander Jager toch veur?! ‘D mut maar beslissen!’besleut de borgemeester. Maar Alexander was an ‘t ver’uuzen, weet ie nog?

En een mense kan maar één dink tegeliekke wil ie gien fouten maakn... Kurtumme: end goed al goed? Nee, bi’j al det gewies van ‘et kassien noa de muure gingk ‘et sluusien reddeloos ten onder!’ Historie vermalen in de meuln van de procedure! Ten ofskeid wassen alle speulers de handen in onskuld. Gelukkig ‘ef de gemeente nog wel de foto’s van de zeldzame bodemvondst. ‘Et heien wier ‘estopt. Maar nog wel dreunen de grond. Now van ‘et stampvoetn van de bewoners van de ‘uuzen die skeurn en van de moedige, maar verslaagn vechters voor het be’old van ‘et hantieke sluusien. En ‘t was net of Mieke Telkamp op de moate deurvan zung : ‘Waarheen, waarom..?’

‘Allo, Hendrik.

Ook bij regen houdt je het droog bij Sail Kampen 2024.
Enorme paraplus boven evenemententerrein houden bezoekers Sail Kampen 2024 droog Algemeen 20 uur geleden
Afbeelding
Luchtbeelden tonen opbouw indrukwekkend evenemententerrein van Sail Kampen 2024 Algemeen 23 uur geleden
Afbeelding
Leg jij het gevoel van Sail Kampen 2024 vast op foto? Stuur je foto in en win. Algemeen 28 mrt, 09:00