’t Is maar wat in disse stad

Zakt in de geute, de kogel is deur de karreke, Reeve dorp wordt e bouwd, en now maar of wachtn ‘oeveule ’t ons giet kostn, want det ’t een kladde geld giet kostn is zeker. Allenig de keuze van de road is in mien oogn in ‘oofdzaak gebaseerd op ’t feit det bouwn minder meer kost dan niet bouwn.

Maar ‘oe dan ook de rekening kump op ’t bortien van ons as burgers neer, en ’t schrijnende is det degene die now die beslissing em e neumm as ’t in de toekomst op belaaln ankump geen van alln meer in de road en in ’t college zittn. ’t Is niet zo muuili’jk um ’t verlies veur oe uut te skoemm noa de volgende generasie. Wat mien opviel was de stem ver’ouding van de SGP, ik eb in ’t ele proces altied begreepn det ze teegn waarn, toch em d’r now een antel sgp’ers veur e stemt. Ik eb dan ook grote bewondering veur SGP roadslid Wim van der Linde die ef de rugge recht oaln en teegn e stemt, een man een man een woord een woord. Toch denk ik det de road nog lange niet of is van de teegnstanders, Reijer van ’t Hul en Bart Zeeven um d’r maar ies een paar te nuumm die zulln pas rustn as alles wat nog mogeli’jk is in de strijd e gooid is.

As ik die mure zie die ze e bouwd em an de Zwolseweg um te veurkoomm daj de stad in kunn, dan bekrop mien een akelig gevuul, een bietien oost west, een soort antastn van mien vri’j’eid. Ak vanuut de Spoorstroate in Iesselmuudn via de langebrugge nou ‘uus wil is det ongeveer 600 meter, now is det zes kilometer, vijf keer in de weke is 1500 kilometer per joar. Ik blieve ’t een onzalig idee vinn. Ie zulln as toerist d’r Langs riedn, oh wat een prachtige stad, ies eemm kiekn, jammer ie kunn d’r niet in, van disse kante NIET welkom in Kampen. Loatn we met zien alln doemm det onze stads bestuurders op tied tot bezinning koomm, want dit wordt echt een ni’j Kamper UI.

Mien kameroad Cees Schilder ef eindeli’jk e kreegn woar ie al joarn recht op ‘ad, de legpenning van de stad Kampen, wat ef die man een kennis van de geschiedenis van onze stad, ’t is net een wandelende ensieclopedie, aj alle boekn die as ie uut e geemm ef op een rij zettn dan eij een dikke meter in de boekn kaste, ’t is een boeiend figuur ik spreke ‘m zowat elke weke en ik mag graag noa ‘m luusteren, eij ef altied wel een mooi ver’aal. En det geldt wat mien betreft ook veur ‘istorica en skriefster Iet Erdsieck, die blef ook met bewonderenswaardige deskundig ‘eid wroetn in de geschiedenis van de stad, en áar laaste boek giet over bloed an de poale, vrouwn die in ’t verleedn een moord e pleegd em, Wi’j em ’t wel ies over de goeie olde tied, maar loatn we ’t maar oaln bi’j de olde tied, want zo goed was ’t toen ook niet. Cees en Iet pette of veur jullie.

Donderdag Koningsdag, ik mag liedn det de weersveurspellers ’t bi’j ’t verkeerde ende em, en det ’t oranje zunnigien uutbundig skient, maar ach mooi weer of slecht weer d’r is altied wel wat in disse stad.

Appien Floep