’t Is maar wat in disse stad,

Zakt in de geute, ie zolln toch denkn now de gemeente road met reces is det ‘r een paar weekn wat rust an ’t front zol koomm, maar niks is minder woar. Martin Ekker is op oorlogspad, ei’j is ’t op zien zachtst gezegd oneens met zien ex collega, wetólder GaitJan Velthoen.

Volgens Ekker ef Velhoen de road wat op de mouwe e speld, of zo Martin in de Brug zei, “ik ‘eb een trap in de rugge e kreegn”. En det is niet niks. Maar ie muttn wel merakels goed ingewijd weezn in de materie um ’t veráal in de Brug in detail te snappn, want ’t nogal ingewikkeld, een kladde gegoogl met cijfers. Maar Ekker zeg det ie alles kan weerleggn, dus d’r zal ongetwiefeld een vervolg op koom.

Wat ik wel jammer blieve vinn, is det Ekker zich niet in zien functie as wet’older ef verdedigd, toen ie inzag det d’r miskien wel een mosie van wantrouwn teegn ‘m in e diend zol worrn, ef ie de ‘anddoek in de ring e gooid en is vertrokkn as wet’older, zonder antwoord te geemm op de vroagn vanuut de road.

En now mut ie as ambteloos burger maar zien det ie zien geliek aald, en det is veule lastiger as daj in ’t centrum van de macht zittn. Want wie een bietien politiek in e voerd is die wet, “weg is weg in de politiek”, aj vandage weg goan zeggn ze morrn, wie is die meneer. En wat gef Velthoen now as antwoord, (citaat) als woordvoerder van het college heb ik slechts getracht de feiten te noemen die in het onderzoek naar voren zijn gekomen (einde citaat). Dus ei’j sprek namens ’t college, en ’iermee ef Ekker ’t noa kiekn.

Ik bin van van de weke ies eem noa de Dam e fietst, maar wat ik zag, gien golden balle op ’t monument van Schokbeton, ‘t geschenk ter ere van de wederopbouw. Dus kon ik ook niet constateern of ’t as een vlagge op een modderskuute stun of dat ’t een bi’jdrage is an de veuruutgang, want d’r is toch wel ’t neudige tot stand e bracht in de wederopbouw. Ik zol wel ies willn weetn wie det bedacht ef en woarumme. Stichting Stadsherstel probeer now eerst ies te achter ‘aaln wat de diepe gedachte ‘ier achter is, want d’r zal zeker over noa e dacht weezn now zeggn jullie bi’j veurbaat det ding mut d’r of, en loop ie saamt be’oorli’jk veur de muziek uut.

Maar d’r bin gelukkig ook nog leuke dingn, d’r wordt wel ie e zegd det Kampen een stad en een dorp tegelieke is, maar met onze Kamper Almanak bin we toch wel een echte stad, want det ef een dorp niet. Ik neme mien pette diepe of veur al die mensen die ’t elk joar weer mogeli’jk maakn um zo’n schitterend document uut te geemm. Ik bin een enthausiaste verzamelaar van de almanakkn, van de drie en tachtig exemplaarn ek d’r vijf en zeumtig in bezit, de oldsten is zowat niet meer an te koomm, maar ik skiete mooi op, alleent de eerste die van negentien acht en twintig det is echt een probleem.

Beste mensen ik goa d’r eem een paar weekn tussn uut, ik wense jullie allemoale, een ‘ele fijne vakansie

En aj weerumme koomm dan is d’r altied wel weer wat in disse stad.

Appien Floep