’t Is maar wat in disse stad

Zakt in de geute, dan denk ie det d’r eindeli’jk vol spied een electrische trein giet riedn tussen Kampen en Zwolle, mag ie niet ‘arder dan tachtig kilometer, en det betekent det ie niet kan stoppn in Stads’agen anders kump ie te late in Zwolle, ’t skient as ie ‘onderd en twintig giet, wat de bedoeling is daj dan zittn te skuddn as was ’t een karmes attraksie, umdet de ondergrond te zachte is, de blunder van ’t joar, en ’t giet weer een kladde geld kostn.

Overigens een merakels slecht moment van Kampen marketing um met een T-shirt te koomm woarop stiet ’t beste van Zwolle is de trein noar Kampen. Buutn det vin ik toch al niet zo’n fraaie slogan, ze zulln ’t in Zwolle maar over neem, ’t beste van Kampen is de trein noar Zwolle. Ik vindt ’t zo wie zo niet verstandig d’r bin zo veule terreinn woar aj mekare neudig em, saam warkn is de beste remedie tot suukses.

Bi’j de gemeente bin ze veurneems um tiedens de ochtend spits ’t verkeer veurrang te geem boom ’t skeepvoartverkeer, en de brugge een bepoalde periode niet te loatn dreien. Elemoale niet zo’n gek idee. Want d’r stoan maar zo an alle vierkanten van de brugge zo’n ‘onderd auto’s te wachtn, umdet d’r een skip deur mut. Of ze det ook in de oamd spits willn doen vertelt ’t ver’aal niet want dan is ’t netuurli’jk niet anders, as de brugge een paar keer opgiet dan stiet d’r in tied van een poep en een skeet een ri’j tot varre veurbi’j de Koornmarktspoorte. Economisch gezien ‘oog tied um d’r wat an te doen.

Karst in oud Kampen, pette of veur Jan Lieftink en zien vri’jwilligers ploeg, wat een prachtig evenement, en wat een kladde mensn. Ik wil niks tekort doen an ‘t karst evenement in Deventer, maar doar muj een dik uur in de ri’j stoan um in ’t Bargkwartier te koom wat doar speult ’t zich allemoale of op det kleine stukkien. Terwi’jl daj ‘ier in de ‘ele binnenstad an oe trekkn koom. Kampen ef zich iermee geweldig op de kaarte e zet, ’t verdient nationale andacht.

21 maart twee duzend achtiene een gedenkwaardige dag, gemeenteroads verkiezingn, daj op dit kleine plekkien op de wereld in alle vri’j éid oe vertegenwoordigers maggn kiezn, loatn we det veural koestern. Want wat zolln veule mensen op aarde det graag willn. Ik ‘eb van uus uut mee e kreegn det ’t een vanzelfsprekend éid is, en oe plicht, umme te goann stemm. D’r is van alles of te dingn op onze democratie, maar ik bin d’r van overtuugd d’r is gien beter systeem in de wereld is.

Nog een paar daagn dan stiet oldejoarsoamd weer veur de deure, de van oorsprong brunneper tradisie ‘t melkbussn skietn speult zich niet allenig meer of op de Noordweg maar ef zich inmiddels over de ‘ele stad verspreid, en as ’t binn de parkn blef dan denk ik daj ’t zeker muttn bliem gedoogn want ook det is een stukkien cultureel arfgoed. En zo goan we vol goeie moed twee duzend achtiene in, en let op want d’r is altied wel wat in disse stad.

Ik wense jullie allemoale “veul ‘eil en zeegn”.

Appien Floep