Kamper Kruudmoes

(door Henk de Koning)

Eerstens wens ik oe een veurspoedig en gezond ni’j jeur toe. Da’s altoos maar weer ofwachtn want elk jeur ‘ef zien hups en downs. Zo mos noa 150 jeur trouwe dienst, ‘et diezeltreintien tussen Kampm en Zwolle plaas maakn veur een medarne helektriekn trein. ‘Et klikn metene want in Zwitserland ‘ebouwd giet de ni’je treine ook tussen Kampm en Zwolle deur barg en dal.

Det kump, de Zwitserse treinsteln bin te licht ‘ebouwd veur de krachtstroom bi’j ons, zodet de locs bi’j ‘et optrekn gaatn graamm in de weke veengrond tussen de rails. Deur klimm ze dan met een sprung’egien weer uut, zodet de reis tussen Kampm en Zwolle now ook deels zwevend wurdt of’elegd. ‘Een achtbane is er niks bi’j,’ zeeg Jannus Flapuut. Umme de veuruutgang niet in de weg te stoan zwijgt de SGP, mits bi’j die karmisse op ’t spoor op zundag maar gien mesiek ‘edrei’jd wurdt… Bange det de ni’je treinen bi’j ‘et optrekn al te dieppe gaatn in de ondergrond zoln graamm en as undergrondse in Zwole en Kampm zoln ankoomm, wier de toe’ezegde snel’eid terug ‘ebracht van 140 km noa 80 km in ’t uur. ‘Gien zweure ingrepe,’ wist Jannus Flapuut. ‘Gewoon eemm ‘et ‘gaspedaaltien’ van ‘et olde Diezeltreintien ansluutn op de stekkerdeuze van de ni’je treinen, en kleur bi’j. Umme met die legere snel’eid toch de meeverkuchte kurtere reistied weur te kunn maakn, wurdt ‘et gloedni’je tussenstation Zwolle-Stadshagen now over’eslaagn en rieden de ni’je treinen in ene ruk deur tussen Kampm en Zwolle. Wel stoan bi’j Zwolle-Stadshagen’ dan reizigers te wachtn, figuranten, die teegn een kleine vergoeding speuln det de tussenhalte wel in gebruuk is umme te veurkoomm det ‘et tv-programma ‘Kan niet weur Wezen!’ er vat op kreg.

Ook is ‘et plaasen van enegie-zuunige boomleidinks veur de ni’je treinen niet ‘elemoale ‘elukt. Wat er now stiet bin de wat duurdere multi-funksjonele leidingks, die dwars deur de treincoupés ook de rails van stroom veurzien met as veurdeel det ‘et Kamper treintien now ook vloerverwarming ‘ef. Noadeel is det de reizigers met netties ‘ekamp ‘eur de trein instapm, maar met de kuif stief rechtop, as bi’j een blikseminslag, er weer uutkoomm. Denk ie ‘et slimste wel achter de rugge te ‘em, giet de Stadsbrugge met een stroomstoringk dwars lègn. De Christelukke partij’jen in de gemeenteroad en Rijkswaterstaat deden det al eerder over et groot onder’old an de Stadsbrugge. An die opknapbeurte giet Rijkswaterstaat dit jeur nog beginn. Metene al spanningk met de vraoge: mag ook op zundag an de brugge deur’ewarkt wurn, in geval ‘et karwei uutlup? ‘Nee!’, roepm de Christelukke partij’jen, zwei’j’end met de zundagsclausule, die de zundagsrust op Christelukke grondslag veurskref. Ook al ruk ie noa de mottebaln. Rijkswaterstaat die de skeepveurt zo min mogeluk hinder wil bezurgen wil wél, zo neudig, op zundag kunn deurwarkn. Beide partij’jn ‘em recht van spreekn. De SGP umme reden det Kampm de Stadsbrugge in eign beheer ‘ef, Rijkswaterstaat umme reden det ze boas is over de rivier. Det Kampm pas nog is benuumd tut Reformatorische Stad van Europa wil niet zègn det ‘et IEsselwater dan ook metene uut wijwater bestiet. As deel van een openbaar bestuursorgaan stroomt de IEssel wel degeluk buutnkarkeluk langs Kampm ‘ene. Deur muj dan zonder karkskeuringk zien uut te koomm…

Wat de stroomstoringk an de hefkleppe van de Stadsbrugge angiet: Noa eerst nog een skip deur te loatn, bleef de hefkleppe boom’an in de storingksstand stoan. Eerst wier nog ‘edacht det de lampies van de brugge niet compettebel waarn met de bedroadingk van de ni’je treine en op die kurte ofstand dan ook kurtsluutingk vereurzaakn . Dark Toestebolte ‘ad det zelf ook al ies mee’emaakt bi’j een verbouwingk an zien ‘uus. Deur bi’j vergis ‘et wachtwoord van zien ‘ietwaterkrane in te programmeern op de sturtbak van zien zwevend twelet, zodet ie bi’j ‘et deurtrekn met de brandbleurn an zien gat as een haze de plee’je uutvleug. ‘t Duurn nogal eer ‘et prebleem met de Stadsbrugge was op’elust. Twee deur’ebrande endskakelaarties waarn de oorzake. Maar vin die maar ies zo rap tussen 40 andere, net eendere skakelaarties… Begin ie veuran is ’t altoos de achterste die ‘t niet dut en denk ie slim te wezen deur metene achteran te begin mu’j toch bi’j de veurste wezen. Gelukkig is ’t allemoale toch goed‘ekoomm want Kampm zonder Stadsbrugge is as een hane zonder kippe! Now toch zo an de proat over ’t olde jeur: pette of veur de horganisasie van ‘Karst in Old Kampm!’ Opni’j een spetterend hevenement det met een grote verskeiden’eid an zang, mesiek en fantasievolle veurstellinks de stad twee oams achter menare spreukiesachtig in de ban ‘ield. Nog ies met dank an Jan Liefting, die ‘Kerst in Old Kampm’ jeurn geleden bedacht en saamt met de Kamper theaterskole ‘Ventura’ in gang zetn ! Dit jeur met ‘et record’antal van 90.000 bezuukers. Bewonderaars overal vandoande! Borgemeester Bort Koelewijn leiden zien klega uut Zwolle trots deur zien sfeervol feestende stad rond. ‘Dan zie’j ook weer ‘et verskil tussen Kampm en Zwolle,’ markn Dark Toetebolte op. ‘Bort Koelewijn zo fier as een pauwe, de borgemeester van Zwolle met ‘et gezichte van een zoerproemme.’ Wat wi’j ook a’j Kampm met karst zo feesteluk uut zien bol zien goan en Zwolle met een toorn’oge ‘Peperbusse’ nog niet op smaak is te brengen...’ Wat ‘et olde jeur nog angiet: op 6 december ook nog op de ofskeidsrecepsie van Sundekloas ‘ewest. Was gien zak an. En noa pakkies’oamd metene ook krenterig! De Pietn veural. Kon nog gien negerzoen meer of. ‘Et mooie ni’js is det dit jeur toch weer deur‘ebouwd giet wurn an ‘et parkeerdek op de plekke van de vroggere gasfebriek. De vervuilde grond mut deur dan uut eign bewegingk bin op’eskoond. Met heien bleek de grond nog merakels vervuild. ‘Gewoon grus over loatn gruujn en dan weer deurgoan,’ ‘ef de gemeente toen bedacht. A’j proatn van regeern is veuruutzien… Nee, de wonderen bin Kampm nog niet uut. Ook niet die met een luchien…

Allo, Hendrik.