’t Is maar wat in disse stad

Zakt in de geute, veur vrienden van ons is ’t een bittere teleurstelling det de Christenunie ’t ofgeloopn weekend in Zwolle tiedens ‘un landeli’jke congres zich in meerder’eid of e zet em teegn ‘t ‘uweli’jk tussn twee mensn van ’t zelfde geslacht.

Een kleine groep ef een dappere poging e doan um de meerder’eid op andere gedachtn te brengn maar ‘elaas is det niet gelukt. Woar ik ‘t ‘ier over die vrienden ‘eb giet ‘t um twee fijne mensn, ze bin gelukkig getrouwd, ze bin monogaam en ze bin christeli’jk. Ik zal mien vardrs maar ont ‘oaln van commentaar, we worrn ‘t ‘ierover toch niet eens, maar mien Rietje en ikke, wi’j vuuln volledig met ze mee.

En nog steeds ret ’t Kamper lijntien met ‘onderd kilometer per uur langs ’t ni’je station van Stadshagen, zelfs ’t kan niet waar zijn van Astrid Joosten dreef d’r op de tillevizie de spot mee, en ie kunn d’r wel lollig over doen, maar uuteindeli’jk is ’t diep treurig. D’r is maar ene echte oplossing um ‘onderd veertig te kunn riedn, de veen grond of gravn en een zand pakket d’r in, maar det kost joarn en veule miljoenn, en doar wil denk ik niemand veur opdreien, ook prorail niet die uuteindeli’jk de verantwoordeli’jke is.

’t Wachtn is op iemand die de oplossing uut de ‘oge ‘oed teuvert, ik betwiefele ‘t of dit ooit goed kump, maar één ding is zeker, wordt vervolgd. Ie zulln maar as organizasie van strand Kampen, (woarumme ofdet det now beach kampen mut ietn is mien een roadsel), maar det terzijde, achterof een rekening van tien duzend euro precariorechten in de busse vinn, is um sloapeloze nachtn van te kriegn, ie zolln toch nooit weer wat durvn te organiseern.

Gelukkig ef een meerder’eid van de roadsfracties een motie in e dient en de wet’older opdracht e geum um d’r met die jonges uut te koomm, en aj doar as gemeente niet veurof dudeli’jk over bin dan is maar één resultaat mogeli’jk, niet betaaln.

Gelukkig is de intocht van suntekloas in onze stad zonder probleemm verloopn, bl’j toe, want aj al die glunderende kienders zien dan is ‘t oast niet veur te stelln det veur en teegnstanders, volwassn kerels, det uut muttn vechtn op de route van de intocht. Vri’j ‘eid van menings uiting is een groot goed doar wik niks an ofdoen, maar goat as grote mensn de confrontasie verbaal en niet met spandoekn op een andere meniere an, en verknal niet een kiender feest.

Nog een paar weekn dan stiet oldejoars oamd weer veur de deure, ook een onderwarp van discussie die elk joar weerumme kump, en det lig in Kampen merakels gevuulig.

Met name skietn met de melkbusse, en det is allange niet meer te vargeliekn met joarn geleedn, gelukkig is d’r gien ME peloton meer neudig um de boel in de ‘and te oaln. Geleideli’jk an worrn de regels an e trokkn, en ’t antal plekkn woar e skeutn mag worrn in e parkt, en toch geleuf ik daj een keer muttn zeggn en now is ’t goed, zo oaln we ‘t. Want ik denke niet det elemoale aofskaffn de oplossing is, ook dit is een stukkien historisch arfgoed wat bi’j Kampen ‘eurt. En zo krop zonder daj d’r arg in em alweer een joar veurbi’j en goed ni’js, of slecht ni’js, d’r is altied wel wat in disse stad.

Appien Floep