’t Is maar wat in disse stad

Zakt in de geute, ei’j ‘t ook ‘eurd, Kamper Kruudmoes is e stopt met zien dialect rubriek in de Brug, Henk de Koning is met pensioen, en det is ‘m van ‘arte e gund maar ’t is wel merakels jammer, want zo giet d’r weer een stukkien ‘istorisch arfgoed verdwien.

Maar ie kunn bliem genietn van zien ” licht gewicht kampers” zo as ie det zelf uutdrukt, ei’j ef zien mooiste stukkies e bundeld en uut e bracht in boekvorm, verkriegbaar bi’j Bos boekn, an de Oldestroate, een waardevol document, veur een ieder die ons Kamper dialect een warm ‘arte toedraagt, een anroader.

Soms koom ie een ingezunn stukkien in de Brug teegn, in dit geval van Willem de Vijfde, woar aj van denkn doar bin ik ‘t now elemoale mee eens, ik ád d’r zelf ook al ies an zittn denkn. ’t Leek mien ook DE oplossing veur ’t Kamper lijntien um ’t probleem veur eens en veur altied op te lossn.

De meest ideale oplossing kost “onderd miljoen euro, en de minst ideale kost niks. Dus zo zeg de brief skriever as ’t in een ‘alf uur niet lukt maak d’r dan een drie kwartiers dienst van, en de trein kan met ‘onderd kilometer in ‘t uur rustig een stop maakn in Stadshagen, want uuteindeli’jk wat is now een kwartiertien op een mensn leem.

Ook det zal ongetwiefeld noadeeln em maar det weegt zeker niet op teegn een investering van ‘onderd miljoen, en ie kunn d’r gerust van uut goan det det niet giet gebeurn, want ze gooin allemoale de konte veur de krib, en niemand is bereid um disse exorbitante rekening te goan betaaln. tweedekamer, provincie, prorail, en gemeente, telt oe zegeningn want ‘t kan toch niet zo weezn det station Stadshagen veur Jan met de korte achtername e bouwd is.

Alles wak over oldejoarsoamd en wat doar um ene in Kampen an de orde is zol skriem valt in ’t niet bi’j de uutgebreide beskouwing van Johan Ekkel en zien neve John van Zuthem, woarvan de Brug in vier ofleveringn uutgebreid andacht ef besteed. ’t Is een compleet beeld van wat d’r zich de ofgeloopn joarn allemoale of e speuld ef rond old en ni’j, de muuite weerd om te leezn en goed dat dit bewaard blef, pette of veur Ekkel en van Zuthem.

Ik ‘ope van ‘arte det alle beparkingn die an ’t vuurwark en ’t melkbus skietn dit joar op e legd bin goan warkn, want ’t valt of ’t stiet bi’j ‘and’aving, en as de burgemeester det ondanks zien goeie bedoelingn niet woar kan maakn, dan is ’t gedoemd um te mislukkn. Zo an’t ende van ’t joar bedank ik meestal eem mien informantn Femme knup in ’t Emp en Derk de Vuurpiepe, veur ‘un goan deurn los die veur mien nog wel ies gesleutn bliemm, ze ‘ellpn mien nogal ies an onderwarpn veur mien stukkien, en doar maak ik dan dankbaar gebruuk van, en as ’t weer gelukt is dan neem we doar saamt een slukkien op.

Ik wense jullie alln van uut welk principe oj ’t ook beleevn, een prettige, een zinvolle, een gezegende, of een zalige karst, en veur allemoale, veul ‘eil en zeegn in ‘t ni’je joar. En geleuf ‘t of niet maar ook in twee duzend negentiene is d’r altied wel wat in disse stad.

Appien Floep