’t Is maar wat in disse stad.

Pette of veur de Sail organizasie, ze em Kampen weer ies goed op de kaarte e zet. Mooie stunt van de sprong in de Iessel, maar ’t was nog spectaculairder e west as de burgemeester d’r achter an e goan was. Maar goed een mense kan niet alles em. Wat mien wel opviel was det in de programma krante van de sail activiteitn geen woord stun over de Heugte de traditionele Brunneper joarmarkt op tweede poasdag, jammer, een gemiste kans. En terwijl van de weke de rotzooi op e ruumd wordt, ook de pette of veur die jonges, giet ’t leem van alle dag gewoon weer deur, ze em nog steeds eufd breekns an ’t Barg’uus plein want ‘oe dan ook de stad mut bestuurd worrn. En det is niet simpel, d’r wordt e skaakt en e skeum en ’t wil nog maar niet lukkn om een college in mekare te timmern. De SGP wil niet meedoen an een wat liberalere zundag invulling, de PvdA wil niet meedoen um det ze te veule verleurn em, en de SP wol in eerste instansie ook niet meedoen, want die ‘adden, en det is niet verrstandig, al in de eerste ronde de deure dicht e gooid, maar die zittn weer an toafel, en det is maar goed ook want aj as grootste winnaar uut de verkiezingn koom dan muj alles in ’t wark stelln um in ’t college te koom, want opposisie voern is wel leuk maar ’t is rommelen in de marge, aj wat willn bereikn dan muj an de knoppn dreien. En dan kuj beter een paar ‘eikele partij standpuntn buutn ’t college programma ‘oaln, uut eindeli’jk beslist toch de road, en veur de rest oe verantwoording neem. En dan stiet d’r in de kantlijn ook nog Gemeente Belang die as grootste verliezer wel in ’t college wil, now is ’t in ’t politieke wereltien alom bekend det beskeidn’eid niet de grootste verdienste is van Albert Holtland, maar ‘ier trekkn ze ge ‘alveerd deur de kiezr toch wel een merakelse grote broek an. Zo doei in ieder geval gien recht an de verkiezings uutslag. En as ’t echt niet lukt dan zol ’t misschien ele maole nog niet zo gek weezn um ies een college te vorm allenig met CU, CDA en VVD, det is dan wel met vijftien van de één en dartig roadszetels een minder ‘eids college maar wellicht kump det de democratie wel ten goede. Er wordt dan ies weer echt e debatteerd, want doart mekeerd ’t nog wel ies an, en giet niet iederene met een veur ingeneum standpunt de vergadering in. Maar wie wet is d’r in de ofgeloopn daagn wel een knien uut de ‘oge ‘oed e koom en is d’r terwijl jullie dit zittn te leezn een college, ’t zol niet gek weezn Want d’r stiet ‘eel wat op ’t programma denk allenig maar an ’t Kogge kwartier wat een klade geld giet kostn en d’r an stiet te koom, en doar mut ’t ni’je college en de road met gezwinde spoed mee an de gang. En zo ziej maar weer d’r is altied wel wat in disse stad.Appien Floep