Leug'n bankien:
't Is maar wat in disse stad
Zakt in de geute, kreeg ik veurige weke een berichien van mien olde politieke kameroad Ruud T, een betrokkn man met liefde veur de stad veur Brunnepe en veur ons dialect.
Ei’j old niet van stadse fratsn zeeg ie woarbi’j ie wees op een bericht in de krante det de “muziekkoepel ” op de Ni’jemarkt wordt gerestaureerd, oe koom ze d’r bi’j wi’j em gien muziekkoepel , ’t is gewoon al meer dan ‘onderd joar de meziek tente niet meer en niet minder, Ie em geliek Ruud loatn we ’t uusien maar bi’j ’t skuurtien oaln.
Biezunder
D’r is een verzekerings maatskappij die zeg “aj maar lange genog gewoon bliem dan woj van zelf biezunder”. Parkeerboetes bin en bliem altied een punt van discussie, een gerespecteerd burger van onze stad kreeg d’r ene van ‘onderd en tien euro um det zien auto niet elemoale goed in een parkeervak stun, en doar was ie zo pissig over det ’t compleet met foto de krante ef ‘aald.
Det deed mien denkn an een paar weekn geleedn, ongeveer de zelfde situasie, ik kwam soams late thuus, ‘ardstikke donker en slecht weer, en de volgende morrn ontdektn ik det mien auto precies op de ‘elfte van twee parkeerplaasn stun, en det doej niet expres of bewust, en ’t is netuurli’jk ook volstrekt idioot det det ‘onderd en tie euro mut kostn, ik kan mien dan ook best veurstelln daj kwoad op zo’n boa worrn en ‘m een miereneuker nuum, en now weet ik wel det die jonges ook ún wark muttn doen maar d’r is wel verskil in, dit was bepoald niet klant vriendeli’jk.
Een gerespecteerd burger kreeg d’r ene van ‘onderd en tien euro um det zien auto niet goed in een parkeervak stun
Noa een uutgebreid ofskeid van twaalf joar burgemeestersskap van Bort Koelewijn goan we een ni’je fase in met Sander de Rouwe an ’t roer. Jong en ambitieus, det liekt in ieder geval een goeie basis veur de toekomst, ieder veugeltien zingt zo ie gebekt is, maar ei’j zal toch echt zien stinkende best muttn doen um Koelewijn te evenaarn.
Want Bort was gewoon Bort, benaderbaar veur iedere, ie konn ’t niet zo gek bedenkn of ei’j was d’r bi’j, zelfs op oldejoarsdag ging ie op een melkbusse zittn. As Sander now ook gewoon Sander blef, in de politiek booom de peti’jn stiet en in de saamleving tussn de peti’jen, dan denk ik we een goeie burgemeester an ‘m kriegn.
Vis’andel Bottenbarg, (zout of zuur lekker en niet duur ) een begrip in Kampen, die skeit d’r deur een andere bedrijfsvoering eind september mee uut op de moandagmarkt, ze em dus gistern veur ’t laatst e stoan, op zich niks biezunders, ei’j is de eerste en ook de de laaste niet die uutskeit, maar wat wel biezunder is ze em d’r ‘onderd joar e stoan, zo’n vier generasies en det is wel biezunder. En zo ziej maar weer d’r is altied wel wat in disse stad.
Appien Floep