Afbeelding
Eigen foto.

’t Is maar wat in disse stad

Algemeen

Zakt in de geute, ik vin ’t prachtig mooi det twee jonge dames een petitie op e stelt em met ’t mooie resultaat van dartien ‘onderd ‘andtekeningn um wat te veranderen an de opzet van ’t stadsstrand disse zomer. En zo ziej maar weer aj maar op een goeie meniere an de belle trekkn dan kump ’t college en de gemeenteroad wel in beweging.

Een mooi democratisch veurbeeld veur andern um op disse meniere een bietien invloed uut te oefenen op ’t beleid. Wat mien veurig joar zo  stoordn was det ‘ekke det an de rand van de Iessel stun, gelukkig wiezn ze doar in de petitie ook op, ie kunn toch prima een drieflijn an ’t ende van de kribbn leggn, zo daj as ’t iete is een bietien kunn peutien baadn.

En now maar ‘oopn det de road luustert en d’r serieus wat an giet doen want op zich is d’r netuurli’jk niks op teegn um zomers te genietn van wat onze mooie stad te biedn ef. Ik ‘eb d’r nooit wat van en zegd en det ‘oevn ook niet want d’r ging twee joar lang gien dag veurbi’j of we werdn in de proat proramma’s bestookt met covid.

Maar gelukkig is ’t zowat zovarre det we corona achter ons kunn loatn en det ’t gewone leem weer zien gang kan goan, want noa twee joar is ’t ook wel mooi e west, ’t wordt ‘oog tied det de stad weer giet bruisn, daj weer noa een terras kunn, uut eetn kunn, en weer noa de stads ge’oorzaal kunn. 

We bin weer toe an oamdvierdaagse, kamper Ui-t daagn, en straks weer karst in old kampen kortumme alles weer goan doen wat we joarn lang as normaal ‘ebbn beskouwd.

Ak volgende moand an de beurte bin veur mien stukkien dan is d’r inmiddels een ni’je road e keuzn, ik bin merakels beni’jd oe of die d’r uut giet zien, want ’t wordt wel spannend, d’r bin tien petijen die striedn um éénendartig zetels, dus ie kunn d’r gevoegeli’jk van uutgoan echte grote petijen is verleedn tied.

De tied det ’t CDA en de PvdA saamt de meerder’eid ‘addn in de road en de dienst uutmaaktn leg varre achter ons. Ik trekke gien petij, maar ik doe wel een beroep op een ieder, maak gebruuk van oe democratische recht en goat stemm, want oeveule landn bin d’r niet waor de mensn stinkend jaloers op ons bin, umdet doar alle e regelt wordt zonder det de burgers d’r op welke meniere dan ook bi’j betrokkn worrn.

Wat ook de uutkomst is, olde road of ni’je road, d’r is altied wel wat in disse stad

Appien Floep.

Nick de Vries

Nick de Vries