't Is maar wat in disse stad
Zakt in de geute, joarn lang bin we met zien alln bange e maakt voor ‘oogwater, waterkeeringn, skotbalkn, kleppn an de Iesselkante, een ‘oogwaterbrigade, de rivier mos zelfs uut e diept worrn want d’r was kans op natte voetn.
En now is ’t ineens andersumme, now is d’r een unieke operasie neudig um de Iessel te reddn en worrn we bange e maakt det we verdreugn, now mut de bodem op e ‘eugd worrn terwi’jl we ‘m eerst verlaagd em want d’r mos meer water deur de Iessel stroom, en zo bliem we bakkn met geld uutgeem.
Maar now bliekt det ze det in Duitsland al een ‘ele tied onderkenn en ze d’r al lange serieus mee bezig bin, dus wie ef d’r ‘ier now weer joarn zitten sloapn.
De ni’jetoorn giet weer in de steigers, althans de boomkante, de zogenaamde lanteern, die is an een skilderbeurte toe, vake loop ie as Kampenaar langs die toorn zonder daj oe beseffn oe biezunder of ie eigenli’jk wel is.
Gebouwd tussen 1649 en 1663, en die lanteern woar ‘t ‘ier umme giet was eigenli’jk elemoale niet bedoeld veur Kampen maar was ontworpn veur ’t paleis op de dam in Amsterdam.
Op zich is de Ni’jetoorn ook biezunder want ’t is één van weinige solitaire toorns in Nederland, ’t was een kwestie van riekdom daj oe zoiets veroorloovn kondn, en rieke was Kampen in die tied, want alle bekende toorns in Nederland zitten an een karke vast, Martinitoorn in Groningn, Sintjan in den Bosch, Sint Servaas in Maastricht, de ni’je karke in Delft, de Peperbusse in Zwolle um d’r maar ies een paar te nuum, allemoale toorns die an een karke vast zittn.
Maar ’t is mien wel een klussien, pette of veur die skilders die det doar boom mutn kloarn, maar of ’t now zo slim is um det in een periode te doen det ’t gloepend kolt kan weezn van september tot ‘alf december vroag ik mien of, ’t liekt mien veule aangenamer um det in ’t veurjoar te doen, maar ja ’t zal wel achter een warm buro bedacht weezn, of bin ik now een bietien sinies, terwijl mien glas toch altied ‘alf vol is.
Zwolle krop steeds dichter noa kampen toe, now goan ze op de grens van s’heernbroek nog ies weer 600 ‘uuzn bouwn, zol mien kameroad uut Zwolle dan toch nog een keer geliek kriegn, die stek mien altied de gek an, dan zeg ie pas maar op ’t duurt niet zo lange meer dan bin jullie wijk K van Zwolle.
En ik steke op mien beurte em dan ook weer de gek an, dan zeg ik ’t mooiste van Zwolle is daj elk ‘alf uur met de trein terug kunn noa kampen.
En zo ziej maar weer blief bi'j de les want d'r is altied wel wat in disse stad.
Appien Floep