Leugenbankien: ’t Is maar wat in disse stad.

Zakt in de geute, de Iesselkogge, die olde skute doar in Lelystad die blef de gemoedern maar bezig oaln, maar aj de bedraagn ook ‘eurn die doar mee gemoeid bin, dan is ’t net oj een emmer leeg gooin. Inmiddels bin ze binn de SGP en de CU in ’t college oardig overstag, um in de beeldspraak te bliem, die em ‘un twiefels of ’t det allemoale wel weerd is.

Wat mien doar bi’j opvalt dak Kampen Sociaal niet ‘eure, de club van Richard Boddeus ook college petij die toch bekend stiet as hoeders van de onderkante van de saamleving die zol toch juigend de SGP en de CU muttn steunn, want ’t giet um een gigantische kladde geld, en niemand kan zeggn ‘oeveule, want ’t is een oopn ende en doar is gien zinnig woord over te zeggn, maar ’t is wel geld  woar oj ook andere mooie dingn veur de stad mee kunn doen.

Goof Lukken, vri’je tijds expert van de universiteit in Breda, die zeeg in de krante, (citaat) de potentie van de kogge is groot, het is authentiek, goed onderzocht en koppelt als tastbaar overblijfsel het verleden van grote rijkdom in Hanzesteden met nu. (einde citaat) Maar die zelfde deskundige zeg ook (citaat) heb niet de illusie dat het een attractie is die op eigen kracht massa’s toeristen trekt.(einde citaat), lot an duudeli’jk’eid niks te wensn over.

Maar uuteindeli’jk is ’t oordeel an de gemeenteroad, en ’t is toch absoluut gien skande um te concludeern det ’t veur een stad as Kampen een te ‘grote broek an is. Want doar zit ‘m now net now de kruks, wetólder Wonink ziet ’t as een blamage as ’t an Kampen zien neuze veurbi’j giet, maar veural now blek volgens de road veur ’t cultureel arfgoed det Kampen elemoale niet verplicht is um die Kogge of te neem is ‘t toch gien skande um d’r ofskeid van te neem.

Want die zelfde deskundige Goof lukken zeg ook det ’t slechts op een paar plekkn ‘aalbaar is um ’t rendabel te maakn, ei’j denkt doarbi’j an een bezoekers aantal zoas op de Keukenhof. We bin niet de enige Hanzestad, d’r bin d’r meer zowel in binnen as in buutnland en ‘t ‘ele verhaal van die deskundige giet ook op in iedere andere Hanzestad veur wie ’t miskien wel financieel ‘aalbaar is.

Wellicht is ’t een idee um ‘ier de bevolking ies over te roadpleegn, as doar een meerder’eid veur is dan muj ’t gewoon doen, maar de consekwensie is wel, as ’t op betaaln an kump dan kump elke investering van de gemeente uuteindeli’jk op ’t bortien van de burgers terechte.

En zo zie maar weer, ’t joar is net begunn en d’r is al weer genog um over te proatn, dus blief bi’j de les want d’r is altied wel wat in disse stad.

Appien Floep.