’t Is maar wat in disse stad

31 december 2024, 11:39 Algemeen

Zakt in de geute, noa een aantal uurn met merakals veule leesplezier ek de Kamper Almanak edietsie 2024 uut. Pette of veur alle medewarkers die d’r weer opni’j in e slaagt bin um d’r een gedenkwaardig exemplaar van te maakn, en de keuze van de redactie um de kroniek umme te zettn in een foto kroniek vin ik een skot in de rooze, leezn is leuk maar foto’s kiekn is ook leuk, en wie ‘m e mist ef ik denke det d’r nog wel een paar te koop bin, kriej gien spiet van. Ik magge toch liedn det ze bi’j de historische vereniging Jan van Arkel die de almanak now uut gef als opvolger van de Bondsspaarbanke in stoat bin um dit unieke Kamper stukkien culturele arfgoed ook noa 2028 de ‘onderd joarige uutgave in ere te oaln, steun betuugingn bin van ‘arte welkom.

’t Liekt d’r op det d’r wat reuring kump in ’t veurgestoane parkeerbeleid van de gemeente, de middenstand wordt wakker, ’t is toch ook niet uut te leggn maximaal ander’alf parkeern in de binnenstad, en dan ook nog tot soams tot tien uur, ie jaagn op disse maniere meer mensen de stad uut als daj ze binn aaln. Maar wat mien ’t meeste opviel was de uutspraak van wet’older Richard Boddeus, die zeeg ja maar alle 31 roadsleedn waarn d’r veur, dus ik goa det niet zomaar verandern, dan vroag ik mien toch of em we ook nog oppositie, of is det verleedn tied en doen we doar niet meer an. Maar loatn al die mensen die denkn det ze ’t now e wunn em maar goed oppassn want ’t liekt op uutstel en det is wat anders dan ofstel.

Wi’j zattn an de karsttoafel zo met zien alln wat te filosofeern over de zoveulste keer ’t zachte weer met karst en zeegn teegn mekare die winters waarn vrogger wel anders, wi’j em saamt nog e skaatst op de Iessel. D’r zat een deerntien bi’j van een joar of twaalf die noa genog geen kolde winters kent, die keek ons an of ze water zag brandn, skaasen op de Iessel zeeg ze oe kan det dan. Vervolgens em we ‘aar nog een bietien e test en em we e vroagd of ze wist wat een glierbane was, now nee dus. We em ’t uut e legd,d’r een kladde sneeuw lag dan maaktn we de sneeuw op de stroate zo glad tot daj d’r op glindern kondn, en det was een glierbane.

Ik ‘ope det jullie allemoale noa gelang oe ofkomst prettige, gezegende of zalige karstdaagn em ‘ad, lekker e geetn maar niet te veule, dan rest mien um alln die dit leezn veul ‘eil en zeegn te wensn veur 2025, en goa d’r maar van uut ook in ’t ni’je joar is d’r altied wel wat in disse stad.

Appien Floep