‘t is maar wat in disse stad

De gemoederen rond ‘t ni’je zwembad bin disse weke in ‘t stad’uus ‘oge op e loopn, Pieter Treep zat in de vuurlinie, zien zwembad plan kost zo’n slordige dartien en ‘alf miljoen euro.En doar zien de verschillende fracties een ‘ard eufd in, in een tied det de boomm niet meer tot in de ‘emel gruuien.De nederlandse zwembond, is een concept an ‘t ontwikkeln met een zwembad det aj alle toeters en belln d’r an vaste knuppn zo’n vijf miljoen euro’s minder giet kosten dan ‘t plan van Treep.In Zutpen bin ze doar ook mee bezig, en één van de jonges van gemeente belang ef doar een politiek vrientien zittn en zo is ‘t koomm det de zwembond veurige weke een presentasie ef e geumm in ‘t stad’uus veur de commissie die over ‘t ni’je zwembad proat, en det levern biezundere momenten op.Holtland begun, en die zeeg metene veurzitter ‘aal ‘t punt maar van de agenda want ik wil eerst veule meer weetn over ‘t plan van de zwembond, en det skeut Treep skienbaar in ‘t verkeerde keelgat want eij kreeg een merakels rood ‘eufd. De coalisie ad ‘t d’r knap muuili’jk mee, ie kondn duudeli’jk markn ze wilden Treep niet veur de voetn loopn, maar ‘t grote verskil tussen de twee varianten sprak ze toch wel an. De PvdA speuldn een vreemd spellegien,die wachten eerst of d’r een meerder’eid was um ‘t onderwarp een moand op te skoemm, en toen zeeg Kristie vd Barg now oef ik eigenli’jk niet meer te zeggn dak d’r eigenli’jk ‘ardstikke veur bin um de zaak an te oaln, det em jullie al veur mien e doan. Jammer aj in de coalisie zittn daj dan kenneli’jk niet vri’ j bin um veur oe mening uut te koomm.‘t liekt een bietien op kadaver disipline.’t was weer as van olds, wi’ j en zi’ j, de coalisie teegn de opposisie. Gert Bakker van de SGP kwam nog met een ‘ele slimme opmarking, want in Treep zien plan is d’r gien bestoansrecht meer veur ‘t zwembad in Iesselmuudn, en det valt binn een deel van de road be’oorli’jk slecht.Bakker zeeg aj de joarlukse explotasie lasten van de twee varianten noast mekare leggn, dan kuj Sonnebarg in Iesselmuudn gewoon los loatn en dan oalie nog centn over, een punt veur Bakker. Al met al ef een meerder’eid van de commissie besleutn um ‘t onderwarp niet in de road te brengn, Treep mut zien ‘uuswark overdoen en bleef achter as een boer met koespiene. En det was nog niet alles, ook de locatie van ’t ni’je bad is een onderwarp van discussie, Hanjo van de kienderboerderi’je ziet de bujje al ‘angen, die wil ’t zwembad niet pal noast de deure em, een stukkien puur natuur woar veule gruuit en bluuit, eij zeg niet woar ’t volgens em dan wel kan, en det zok dan ook wel graag van ‘m ‘eurn, maar det ie d’r bi’j betrokkn mut worrn stiet veur mien as een poale boomm water.’t Skient det ’t college de komende begroting sluutend ef, zonder extra lasten ver’oging veur de burger, um stad’uus taal te gebruukn em ze ’t ambietsie nivoo noar beneden bi’j e steld, en det getuuugd van realiteitszin, en det mag dan ook wel ies e zegd worrn.Beste mensen blief bi’j de les, want d’r is altied wel wat in disse stad.Appien Floep