’t Is maar wat in disse stad.

Zakt in de geute, de deurn van de politieke arena bin nauweli’jks los of de eerste rimpels bin zichtbaar. Met enige verwondering ‘eb ik ’t ver’aal van Richard Boddeus over de kritiek van zien petij, “wat is dit veur idioot gedoe binn de SP”, mee e kreegn.

Maar veur een SP ér is zien mening nogal veuruutstrevend, ze kiekn allenig nog maar noa de onderkante zeg ie, terwi’jl de meeste mensen be’oorli’jk verdienn, een knap ‘uus em en goeie zorg. Bin ik met ‘m eens, maar toch, de mensn an de onderkante en die bin d’r ook nog zat zulln ‘m det niet in dank ofneem, en of dit soort uutpraakn zo’n ‘alf joar veur de gemeenteroads verkiezingn now zo verstandig bin det betwiefel ik. Richard is een goed roadslid maar wat ier mee veuref is mien een roadsel.

Volgens Richard doen ze in plaase van ene stap veuruut twee stappn achteruut in de geschiedenis. De SP ‘ad noa joarn roepn oe ’t allemoale mut eindeli’jk ies an de andere kante van de toafel ad muttn goan zittn, ze bin zo zachies an niet meer geleufwaardig en veural umdaj weetn det d’r vanal det roepn in de opposisie weinig terechte kump, ie kunn allenig maar wat bereikn aj an de knoppn zitn. ’t Zelfde geldt overigens veur Gruun Links, veur det Jesse Klaver de onder’andelingn in ging, ( ik kenne in Amsterdam iemand die dichte bi’j ’t vuur zit) zeeg diegene, det wordt niks want Jesse kreg gien wisselgeld mee, want aj onder ‘andelen muj wisselgeld bi’j oe em, en det is e bleekn, want Jesse wol wel maar ei’j werd keer op keer terug e fleutn, ei’j kreeg van krachtn binn zien petij gien enkele ruumte. Dus ook veur GruunLinks geldt weer vier joar veule roepn en weing bereikn, merakels jammer, een gemiste kans.

’t Duurt nog wel eem maar over een álf joar bin de gemeenteroads verkiezingn, de peti’jen bin vast al bezig met de veurbereidingn, verkiezingsprogramma skriem, kandidaten lieste vast stelln, ( in de wandelgangn wordt e fluustert det ons nog wat verrassingn te wachtn stoan ), campagne commissie saamstelln, acties bedenkn, folders drukkn, ze bin d’r maar druk mee.

Over één ding ‘oevn ze zich niet meer druk te maakn want een onderzuuk ef uut e weezn det plakken op de borden geen effect ef, ’t is achter’aald en ‘t levert gien stemme meer op. Dus maar goed over noadenkn en of skaffn want ’t skeelt de gemeente een kladde geld.

Boomaamtstroate veertiene stiet donderdag oamd veur de zoveulste keer weer op de agenda van de road, Gruunlinks en D66 em d’r opni’j vroagn over e stelt an ’t college en die ef d’r elf bladzijdn veur neudig ad um d’r antwoord op te geem, op de pagina van de gemeente kuj d’r kennis van neem, maar ie mutn van goeie uze koom um deur de boom ’t bos nog te zien, oe lger ’t duurt oe ingewikkelder ‘t wordt, ik eure wet’older gaitjan Velthoen in twee duzend twaalf nog zeggn met een ‘alf joar eb ik ’t rond, we bin now vijf joar varder, ik bedoele maar. ’t Zol toch een brevet van onvermogen van road en college weezn as ’t in disse roadsperiode niet of e rond wordt.

En zo ziej maar weer ie muttn bi’j de les bliemm want d’r is altied wel wat in disse stad.

Appien Floep