’t Is maar wat in disse stad
· leestijd 1 minuut AlgemeenZakt in de geute, kampen ef ’t goed e doan met de verkiezingn, en dan ek ’t niet over de teleurstelling die d’r bi’j sommige partijen zeker is over ’t verlies van zetels maar over de opkomst van ruum 65 procent, det is boom gemiddeld. En now maar ‘oopn det ’t niet al te lange duurt veur det d’r een ni’j en daadkrachtig college an giet treedn want d’r leg een kladde wark te wachtn die um een oplossing vrog.
Veurige weke vroeg iemand mien ‘oe zit ’t toch met die voorkeurstemm, now kort gezegd veur diegene die ’t niet wet, ie em een kwart van de kiesdeler neudig um met voorkeurstemm in de gemeenteroad te koom, maakt niet uut op welke plaase oj op de lieste stoan In kampen bin d’r ruum 28 duzend stemm uut e bracht, aj det deeln deur 31 ( ’t antal roadszetels) dan is de kiesdeler 915, en aj det dan weer deeln deur 4 det is 228, det is een kwart van de kiesdeler, dus ie em minstens 228 voorkeurstemm neudig um in de road te koom. Inmiddels is alles e telt en d’r koom twee vrouwn met voorkeurstemm in de road, ene veur Grl/PvdA en ene veur D66.
Zol ’t d’r dan eindeli’jk van koom det de Sportcampus gestalte kreg, ’t buro wat ze in eerste instansie noa ‘uus e stuurd em, umdet d’r gien overeenstemming was met de verenigingn woar ’t umme dreit, em ze opni’j van stal ‘aald, en now wordt d’r wel e proat met de belang‘ebbendn, wie wet eind goed al goed.
Goed ni’js uut de provincie, ze steun drie evenementn, te weetn Kerst in oud Campen, de Dudok muziek daagn en ’t Ful Color festival, ieder met max twaalf duzend euro. De provincie nuumt ’t belangrijke lokale evenementen die ook regionaal publiek trekkn, oopn det ’t ook een signaal is noa de gemeenteroad det die d’r ook van overtuugd bin en als ‘t neudig is ook de pottemenee trekkn.
En d’r stiet ook weer wat ni’js op stapel, noast de kamper Ui’tdagen kriegn we now ook de kamper Ei- daagn, aj ’t zo leezn dan liekt ‘t wel een oardig evenement te worrn zo rond de Poasn, en wie wet sloat ’t wel zodanig an det ’t ook een joarli’jkse tradisie wordt, en giet de provincie ’t ook een lokaal evenement nuum met regionale uutstraling.
En d’r is nog meer goed ni’js, de historische vereniging "Jan van Arkel" ef in alle wijs’eid in ‘aar vergadering besleutn det de Kamper Almanak blef bestoan, ’t zol toch ook grote zunde weezn als det ‘istorische boek noa zowat ‘onderd joar zol verdwien, ’t is echt de muuite weerd um lid te worrn van disse vereniging doar kriej absoluut geen spiet van. En zo ziej maar weer, d’r is altied wel wat in disse stad.
Appien Floep.leugen
