Afbeelding

’t Is maar wat in disse stad

· leestijd 2 minuten Algemeen

Zakt in de geute, wat is det now,? ’t giet niet goed met ons ni’je zwembad de Steur, d’r mut zwoar geld bi’j, we loopn ’t risico det de boel dichte giet, sportfondsen gef d’r de brui an, maar det zol toch te gek weezn in een stad van meer dan vieftig duzend inwoners.

Maar tot mien verbazing bin we bliekbaar niet de enige, want ’t mooie zwembad de Veldkamp in Wezep stiet ook financieel gezien onder water, ook ‘ier is sluting niet ondenkbaar, en det wellicht al in oktober. As de gemeente Oldebroek ’t bad tot 31 december los wil oaln dan muttn ze d’r ‘onderd duzend euro bi’j doen. Now beskik ik niet over cijfers van ’t zwembad in Hattem maar doar skient ’t ook niet allemoale rozengeur te weezn.

Een skroale troost, maar det wil niet zeggn det we d’r ons maar zo bi’j neer muttn leggn, ’t woord is an de gemeenteroad, doe oe best zok zeggn want een ni’j zwembad op slot doen det kuj niet maakn. En weer de discussie opraakln , addn we ons olde zwembad nog maar doar skietn we ook niks mee op, det is een koe in de konte kiekn.

Gelukkig liekt ’t d’r op det d’r belangstelling is um de exploitasie voorde te zettn, loatn we maar ‘oopn en doemm det ‘t lukt ’t zol fijn weezn as d’r gauw een middel kump um van die ellendige corona of te koom, want ’t zet ons leem toch wel behoorlijk op de kop, noa alles wat we disse zomer al e mist em, muttn de kienders tammee ook nog de suntekloas intocht missn, en det geldt ook veur karst in old Kampen, ook det giet niet deur.

En de borgemeester wet niet oe of ie ’t veurmekare mut kriegnen um oldejoarsoamd in goeie baan te loatn verloopn, en now kuj karst in old Kampen wel een joar oversloan. Maar ie kunn muuili’jk oldejoarsoamd ofskaffn, det giet niet, maar ‘oe dan ook old in ieder geval die tradisie in ere en geef de skutters in goed overleg toch maar een bietien de ruumte want linksumme of rechtsumme d’r wordt toch e skeutn met melkbussn.

Moandag 14 september ging de skuppe de grond in veur Reeve dorp, een buurtskap van 600 ‘uuzn, toevallig zat ik te luustern noa radio Oost die waarn in gesprek met wet’older Holtland, ze vroegn ‘m wat doar de vierkante meter pries was, iets boom de vier ‘onderd euro de vierkante meter zeeg ie, Oh was de reactie is dit wel een pries veur alle kampenaarn, ja zeeg Holtland letterl’jk: det kunn alle kampenaarn betaaln, en van een wet’olders salaris zeker.

Det dit ‘aalbaar is veur de gemiddelde kampenaar doar geleuf ik ‘elemoale niks van, ik dorve zelfs de stelling wel an det driekwart van de kiezers van gemeentebelang woar Albert Holtland wet’older van is, ‘ier echt niet an toe kump. D’r was ook een Amsterdammer zeeg ie die vun ’t skienbaar een keupien, want die zei geef mien maar een penne, dan teekn ik gelijk veur een kavel. En det is now net wat mien merakels piene dut, ‘t gebied is ontwikkeld met veule gemeenskaps geld, ook een kladde Kamper geld, en dan goan waarskijnli’jk straks kopers van buutn d’r mooi weer van speuln.

En zo ziej maar weer, d’r is altied wel wat in disse stad
Appien Floep.