’t Is maar wat in dise stad
· leestijd 1 minuut AlgemeenZakt in de geute, gelukkkig kump d’r toch nog een poging van Beent Keulen, bestuurslid van de gebieds cooperasie IJsseldelta um de uutkiek toorn als eerbetoon aan de bekende Kamper vogelaar Jan Nap (ridder in de orde van Oranje -Nassau) op ’t Kampereiland veilig te stelln. Ik zol zeggn goa zelf maar ies kiekn ‘oe desolaat of die toorn d’r in ’t prachtige Nationaal Landskap IJssel Delta d’r bi’j stiet, de troan springn oe spontaan in de oogn.
Kampenaar skaam ie oe aj d’r bi’j stoan, en neem asteblief gien gastn mee want ’t is niet uut te leggn. Eerst een fraaie uutkiek toorn neer zettn, nooit gien onder’old pleegn en dan noa joarn ach en wee roepn. D’r mut geld veur op toafel koom det is dudeli’jk, d’r zulln verskillende bronn muttn worrn aan e boord, maar Ik mag liedn det ene van die bronn ook ’t gemeentebestuur is, opdet ze beseffn dat die skantvlekke niet stiet op HET Kampereiland maar op ONS Kampereiland, en doar ‘un conclusie uut trekkn en een éénmalige bijdrage doen.
Miskien een suggestie veur Beent Keulen en een iederene die dit project een warm ‘arte toedraagn, probeer ook ies wat creatief te weezn, ik leeze net in de krante det ’t Cultuurfonds Overiessel dit kwartaal ruum 4 ton toe e kend ef an 86 projectn in de provincie veur cultuur en natuur veur een brede doelgroep. Now als d’r now één natuur project is woar een breed publiek van kan genietn dan is ’t wel de uutkiek toorn van Jan Nap.
De trots van ons Hanzeverleedn “de Kamper Kogge” is in Visby in Zweden veur de Hanzedaagn, pette of veur al die vri’jwilligers die dit mogeli’jk maakn, een mooie geleegn ‘eid um Kampen op de internationale kaarte van ‘t Hanzeverbond te zettn.
Gelukkig em ze knap weer ‘ad want ’t liekt mien gien lollegien um met slecht weer op de Oostzee te muttn vaarn met die skuute.
Toch wil ik ook nog graag eem een keertien kwiet det wi’j ’t slechts aan ene man te dankn em die ’t veur mekare e kreegn ef um die Kogge te realiseern en det was old wet’older Henk Bastiaan, aan ‘em en aan niemand anders em we de Kogge te dankn, ook veur Henk alsnog posthuum de pette of.
Aj saamt nog wat koppies en skottelties over em, denk dan eem an onze ambtenaarn in ’t gemeente ‘uus an ’t Barg’uusplein want die muttn ze in ’t kader van de bezunigingn in ‘t vervolg mee neem van ‘uus, en ze muttn ze nog zelf ofwassn ook, net of ze niks anders te doen em. College wat maak ie oe belacheli’jk met zukke bezunigings veurstelln.
En zo ziej maar weer, d’r is altied wel wat in disse stad.
Appien Floep.
