’t Is maar wat in disse stad

Zakt in de geute, een keer ies ‘eel wat anders, want ik kan wel weer goan beginn over Karst in old Campen, Sail, of ’t parkeerbeleid, d’r bin gelukkig al ‘eel veule ook zinnige woordn over e zegd, ik zol alleent maar in ‘er’aling valln. Ik mag alleent ‘oopn det de gemeenteroad zien wark serieus nemp en al die ‘onderdn vri’jwilligers die ‘ier mee bezig binn niet in de kolde loat stoan, en luustert noa al die mensen die ’t parkeerbeleid an de orde stelln. 

Veurige weke vroeg mien iemand noa ’t stroatn plan van Kampen, now en die ek ies op e zocht, en aj oe doar wat varder in verdiepn dan koom ie tot een biezundere conclusie. Aj now ies kiekn noa de wat jongere wiekn bi’jveurbeeld de Maten, Bovenbroek, de Flevowiek, Cellesbroek, of de Oranjewiek dan worrn de stroatnaam uut e spreukn zo ’t op papier of op ’t naambord stiet, d’r bin gien dialect woordn veur, probeer ’t zelf maar ies. Gelukkig bin d’r veur ons die ’t Kamper dialect machtig bin nog genog stroaten die we wel in ’t dialect uutspreek, en ik ope det det nog veule gebeurt. Dus we goan eem een lessien dialect doen, Um te beginn, Straat wordt Stroate, Dijk wordt Diek en Steeg wordt Steege. 

‘t Achterom-’t achter Ummegien, Bovenhavenstraat- Boom aamtstroate, Buitenhavenstraat- Buutn aamtstroate, Botermarkt-Bottermark, Bovennieuwstraat-Boom ni’jstroate, Buitennieuwstraat-Buutn ni’jstroate, Bovensingel-Boomsingel, Broedersingel- Breursingel, Broederstraat-Breurstroate, Broederweg- Breurweg, Bovenhofstraat-Boom’of stroate, Buitenhofstraat-Buutn ‘ofstroate, Buitenbroeksweg-Buutnbroeksweg, Buitenkade-Buutnkade, Buitensingel-Buutnsingel, Burgwal-Borgl, Dijkstraat-Diekstroate, IJsseldijk-Iesseldiek, IJsselkade-Iesselkante, Mandjeswaard-Mantiesweerd, Morrensteeg-Mornsteege, Nieuwemarkt-Ni’jemark, St. Nicolaasdijk- Suntekloazendiek, Groenestraat-Grunestroate, Voorstraat-Veurstroate, Bregittenstraat- de Ellegesteege, Molenstraat-Meulnstroate, Schapensteeg-Skoapnsteege, Oudestraat-Oldestroate, Broederpoort-Breurpoorte, Cellebroederspoort-Cellespoorte, Cellebroedersweg-Cellesweg, Stadsbrug-de langebrugge, Bovenkerk-Boomkarreke, Buitenkek-Buutnkarreke, Broederkerk-Breurkarreke, Poortkerk- Klumpieskarreke, Berghuisplein-Barg’uusplein, Kamperstraatweg, ’t Lange ende. 

En ’t is dan wel gien stroate maar op ’t Unieplein cafe de Unie- de skele. En wat ook oardig is alle steegn op de Oldestroate em een drumpl woar de name van de steege in ’t dialect stiet, wellicht een idee det ’t weerd is um een vervolg an te geem Want wat det betreft kunn we een veurbeeld neem an Friesland die koestern ‘un taalgien ander. Miskien bin d’r nog wel meer stroatn te nuum en als det zo is dan ‘eurn wi’j det graag want dan kunn we de lieste compleet maakn.

Loatn we bli’j weezen det de ‘Ogeboom soop an de overkante van de Iessel tot een goed ende is e koom, veur de mensn die d’r al joarn woon en die gelukkig kunn bliem zittn, alleent jammer det ’t met tussenkomst van de rechter e kloard mos worrn, ’t zol toch veule beter weezn als det in een normale procedure in ’t gemeente’uus tot stand was e koom.

En zo ziej maar weer d‘r is altied wel wat in disse stad.

Appien Floep