’t Is maar wat in disse stad,
· leestijd 1 minuut AlgemeenZakt in de geute, ik wete dak mien op glad ies begeve maar ik mut ’t toch eem kwiet, veurige weke las ik det een ‘ond een klein untien ad dood e beetn, en ei’j ‘ad ook al ies een katte te pakkn ‘ad, en toen ’t was gebeurt met de ‘ond, ei’j is of e maakt. Maar als een wolf twintig skoapn dood bet, jammer, dan mut die boer maar een ‘oog ‘ekke um zien Land zettn, en als een wolf een ponny dood bet, ook jammer, det ‘eurd d’r now één keer bi’j volgens de wolven fens.
Wat muttn we now toch met die wolf, toen d’r ‘onderd vieftig joar geleedn zeum miljoen mensn in Nederland woondn was de wolf welkom die ‘ad de ruumte, en toen d’r geleideli’jk meer mensn kwamm verdween de wolf, en now bin we met achtien miljoen in ons kleine lantien en now mut die wolf zo neudig terug. D’r loopn inmiddels een antal roedels met jongn op de Veluwe, die bin binn de kortste keern groot, en een natuurli’jke vijand em ze niet, dus wie wet oeveule ‘uppeln d’r volgend joar wel niet rond, en woar bliem die allemoale.
Wie wet miskien is ’t Kampereiland wel an de beurte, en wat doen we dan, ook een ‘ekke um ’t Kampereiland zettn. Als een wolf als ie ‘onger ad now een prooi paktn dan was ’t nog tot doar an toe, maar een wolf is een moordenaar, oe meer ‘oe liever of ie d’r dood bet. Miskien bin ik ‘r te simpel veur, maar al die ver’aaln oe goed of ’t wel niet is det de wolf terug is, ik snappe ’t niet, maar det zal wel an mien liggn.
Wat de gemeente volgend joar allemoale veranderen wil met ’t parkeern in de binnenstad is niet niks, ik ‘eb ’t ver’aal wel twee keer e leezn veur det ’t elemoale bi’j mien binn kwam. ’t Is wel een eleboel kunst en vliegwark, maar ik neme an det de road d’r ook nog serieus noa giet kiekn, ik kan mien niet veurstelln dat dit d’r ongeskundn deur kump ’t Meest vreemde vin ik nog daj nog maar ander‘alf uur maggn parkeern in de binnenstad, doar zulln de winkeliers niet bli’j mee weezn, en det geldt dan ook nog tot tien uur s’oams.
Lekker aj um kwart veur achte oe auto op een betaald parkeerplaase zettn um noa de stads gehoorzaal te goan, muj kwart over neegn de zaal uut um een euro in de parkeermeter te gooien, of ie goan um zeum uur een ‘appien eetn, muj um ‘alf neegn noa de parkeermeter. En now weer de parkerplaase an de Bongerd, doar willen ze een derde van de capaciteit weg saneern, wat bin ze toch raar bezig. En zo ziej maar weer d’r is altied wel wat in disse stad.
Appien Floep
