’t Is maar wat in disse stad
· leestijd 1 minuut AlgemeenZakt in de geute, was ik onlangs op de fietse veur een runtien op ons prachtige kampereiland, kwam ik langs de vogelhut die vernuumd is noa Jan Nap, eerbetoon an de bekendste vogelaar van Kampen. Now dan springn oe spontaan de troan in de oogn, ’t is te gek veur woordn, zoas de boel d’r uut ziet, ’t is ene grote bende, ie kunn niet meer nao boom klimm, leems gevoarli’jk.
Ik bin d’r ies in e deukn, “de Brug” ef d’r in april 2021 al andacht an besteed, en doarin werd dudeli’jk det StaatsBosBeheer de gene is die verantwoordeli’jk is veur ’t onder’old, en die lot ’t ofweetn, die zeggn det ze d’r gien geld veur em, ’t Is een grof skandaal. Maar de gemeente lot ’t ook ofweetn want die wet natuurli’kgien ander det d’r in 2010 is besleutn om de name van de toorn an Jan Nap te verbindn, en det skept toch ook een verplichting.
De gemeente die tonn uutgef an allerlei onderzuukn, die elke moand vijf duzend euro betaald an ‘ure van twee winkelpandn an de Oldestroate die niet gebruukt worrn, dut net of ze gek bin, die lot die vogelhut gewoon verpaupern. Ik roade de roadsleedn an um zelf een stukkien verantwoordeli’k ‘eid te neem en doar ies te goan kieken, want dan ik mien niet veurstelln det d’r niet ene is die zich skaamt en niet met een veurstel kump um doar wat an te doen, ’t is de gemeente onwaardig um ‘t doar zo te loatn.
Want aj d’r dan toch niks mee willn dan kuj um maar beter sloopn want dan doej Jan Nap meer ere an dan die uutkiek toorn te loatn stoan tot ie elemoale in mekare stort, maar nogmaals gemeente neem oe verantwoordeli’jk ‘eid en knap die vogelhut op, doar giet Kampen echt niet fajiet an, en oal ie de bekendste vogelaar van Kampen in ere.
Zwemm in kampen old de gemoedern disse zomer be’oorli’jk bezig, en det is niet zo raar want eigenli’jk bin we een eiland, want we bin inmiddels umringd deur water. En dan is ’t toch gek det d’r nanns een fesoenli’jk zandstrand is woar kampen zich kan verpoozn. Want ’t strantien bi’j de Meule, wel leuk maar is toch eigenli’jk een bietien treurig veur een stad met vieftig duizend inwoners. En dan kuj wel wat an ’t Reevediep realiseern maar aj d’r niet maggn zwemm, dan skiet ie d’r ook niet zoveule mee op. Ik denke det de suggestie um ’t zwembad bi’j Seuveningn ni’j leem in te blaozn elemoale zo gek nog niet is, en det ‘oeft toch niet een vermoogn te kostn. En d’r bin nog veule meer goeie ideeen, College en road luuster noa oe burgers en doe d’r wat mee. En zo ziej maar weer, d’r is altied wel wat in disse stad.
Appien Floep
