Leugenbankien: T’is maar wat in disse stad
· leestijd 1 minuut AlgemeenZakt in de geute, zol ’t now eindeli’jk tot een zinvolle discussie koom, now de Christenunie zich of vrog of ’t grote landbouw verkeer niet definitief over de Meuln brugge kan. ’t Is toch ook niet uut te leggn det ’t zwoare verkeer niet over de Meulnbrugge mag maar wel dwars deur de stad over de Iesselkante, bin beni’jd of d’r now eindeli’jk ies een knuppe wordt deur e ‘akt.
Det ni’je verkeersplan wat veurleg veur de binnenstad, det ef nog al wat um ‘andn, ik denke det de ondernemers vereniging geliek ef det ze twiefels em as ’t stukkien bi’j bietien wordt uut e voerd, ie mun ’t goed anpakkn of niet anpakkn.
Wi’j de binnenstad antrekkeli’jk ‘oaln, dan muj de klantn die met de auto koom niet de stad uut jaagn, ie kunn now wel willn det iederene op de fietse noa de stad giet maar zo warkt ’t now éénmoal niet.
‘t Is mien wel een roadsel det zo’n ingriepend plan veur een aantal parti’jen of e doan kan worrn as een ‘amerstuk, alleent ‘t al dan niet betaald parkeern op zundag rechtvaardigd ’t um ‘ier over serieus van gedachtn te wisseln want det ‘r deur sommign e zegd wordt dan koom d’r wat minder mensn op zundag noa de stad, wat een rare redenering, maar gelukkig is ’t goed e koom.
Neudig ze juust uut en Loat mensen ook op zundag genietn van alles wat onze mooie stad te biedn ef, en biedt ze dan as gastvri’je stad een gratis parkeerplekkien an. Joarn lang ef de gemeente ’t beheer over ’t Kampereiland zelf e doan, d’r was een landbouwkundige, d’r was een roadscommissie stadserven en landeri’jen, niks an de ‘and.
Maar vernieuwingsdrang leidn d’r toe det d’r een rentmeesterkantoor de zaak mos overneem. En noa zeumtien joar mos d’r weer een ander koom want die was in de anbesteding kenneli’jk wat goedkoper, “marktwerking” nuum ze det, now ‘ad maar een keer in de broek e doan.
Want dit rentmeesterskantoor wil now van de gemeente drie ‘onderd en vieftig duzend euro ex BTW, dus ruim vier ton extra em umdet ze meer wark em verricht. En now bin ze kwoad en ze vinn ’t onfatsoenli’jk want ze ‘addn e wild det de gemeente det onder de pette ád oaln, ie muttn mar dorvn, te gek veur woordn.
Gelukkig ef de wet’older det niet e doan en ei’j ef d’r melding van en maakt an de road, en ei’j ef d’r bi’j e zegd det ie ’t niet zonder slag of stoot giet betaaln. Now bin ik arg beni’jd of de gemeente de rugge ies een keer recht oald, of det ze uut eindeli’jk toch met ‘angende peuties met vier ton gemeenskaps geld noa ’t rentmeesters kantoor goan, we wachtn ’t of.
En zo ziej maar weer, d’r is altied wel wat in disse stad.
Appien Floep.
