’t Is maar wat in disse stad.
· leestijd 1 minuut AlgemeenZakt in de geute, det is mien now toch ook wat, de stichting Stad Herstel old d’r nou 40 joar mee op, ze zien ’t niet langer zittn. Ik vinne ’t merakels jammer want die club ef echt veule mooie dingn bereikt, ‘t in stand oaln van ons beskarmde stadsgezicht, ’t veurkoom van beoogde sloop plannen, en met name be’old van ’t arfgoed in de binnenstad. Zonder de stichting Stads Herstel, addn we bi’jveurbeeld gien muur reclames en gien gevelsteen meer ‘ad, ook det maggn ze op ‘un konto skriem.
Maar wat echt jammer is det ze zich niet meer serieus e vuuld worrn deur onvoldoende steun en regie vanuut de gemeente, althans det zeggn ze, en as det zo is dan mut de gemeente zich det echt serieus antrekkn. En wat d’r ook nog bi’j kump is woar vri’jwel alle verenigingn en stichtingn mee te maakn em onvoldoende anwas van ni’je bestuursleedn, det wordt in de toekomst een groot probleem. Nogmaals arg jammer, ’t is een verlies veur de binnenstad en veur Kampen, maar ún besluut stiet vast en is onherroepelijk.
Maar ’t is toch te ‘oopn det d’r opni’j een luus in de pels opstiet die de gemeente skarp blef oaln deur te zeggn, “we bin ’t zat, d’r is al genog e sloopt in onze mooie stad”. Ik neme mien pette diep of veur al die mensen die 40 joar lang prachtig wark em verzet veur onze Hanzestad, die ’t absoluut weerd is um zunig op te weezn.
Ik ‘ad mien ‘eilig veur e neum um niet meer over de Boomaamtstroate te proatn, maar ’t allerlaaste wak d’r over wil zeggn is, wie maakt d’r in onze stad now de dienst uut, de road of een annemer, d’r bin dudeli’jke ofsraakn e maakt, d’r is een sloopvergunning verleend onder de voorwaarde, de villa mut ‘erbouwd worrn. En gemeente road aj now tijdens de wedstrijd de spelregels goan veranderen dan bi’j een onbetrouwbare over’eid en saamt gien knippe veur de neuze weerd.
Veurige weke vroeg iemand mien, ie weetn wel een bietien van ’t dialect, vertel ie mien ies woarumme nuum wi’j een “lieveheersbeestje” een ” koekediefien” ‘oe zit det en oe koom ze an die name en wat ef det met mekare te maakn. Now det old mien al een weke bezig maar ik kome d’r ook niet uut, dus bin ik maar ies goan zuukn, in twee duzend negentien, is ’t woord koekediefien e keuzn tot ’t mooiste woord van ons dialect, maar wat de achtergrond is um det beesien zo te nuum doar wordt niet op in e goan, as d’r iemand is die mien det wel kan vertelln, dan oal ik mien van ‘arte anbeveuln, dan kan ik ook weer rustig sloapn.
En zo ziej maar weer, d’r is altied wel wat in disse stad
Appien Floep
