Afbeelding
Foto: Eigen foto.

’t Is maar wat in disse stad

· leestijd 1 minuut Algemeen

Zakt in de geute, ik weet niet oe of ’t jullie vergiet maar ik bin d’r nog zo ene die graag wat contant geld in de zak ef.

En waorumme kom ik ‘ier now op, det mut mien eem van ‘t ‘arte, veurige weke sprak ik een skooljuffrouw en toen ‘addn we ’t zo over contant geld en toen zeeg ze ik ‘eb kiendes van een joar of acht tot tiene in de klasse, en weetie wat ’t is, ze em gien benul van geld, ze goan met moeder noar de supermarkt, de boodskappn worrn in e laadn en moeders betaald met een plestiek kaartien en wat d’r veur weerde in de tasse giet, ze em d’r gien idee van.

Ik ‘eb een kassa in de klasse stoan zeeg ze en ik probeere ze bi’j te brengn wat de weerde van geld is, ik geeve ze bi’jveurbeeld een briefien van tien euro en loate ze wat boodskappn doen, sommigen pakkn veur zeumtien of achtien euro en em gien idee daj det met een briefien van tiene niet betaaln kunn en daj doar meer geld veur neudig em.

En wat mien ook opvalt ’t gebeurt nog wel ies aj bi’j een kassa koom en ie zeggn zak d’r een dubbeltien bi’j doen um ’t bedrag rond te maakn, nee doe maar niet, ze skietn in de stres.

‘t zal wel an mien liggn maar ik arrege mien stief ak annes kome woar ze de arrogansie em te melden daj niet meer met geld kunnn betaaln, terwi’jl ’t een wettig betaalmiddel is, en wat mien betreft mut det ook zo bliem.  Mee eens of niet mee eens, ik ‘eure ’t graag.Wat em we toch merakels veule regels in dit land, neem now ’t besluut van ’t college van BenW um ’t Hanzepaviljoen an de overkante van de Iessel een definitieve vergunning te geem. Maar det giet maar zo niet want de road beslist uuteindeli’jk. En as die in principe ja zegn dan begint ’t pas, de boel wordt ter inzage e legt en doar kuj zes weekn oe zienswijze op indienn, zeg de road doarna op ni’j ja dan em belang’ebbenden weer zes weekn de tied um bezwoar te maakn. 

Maar zegt de road nee dan kreg de eigenaar van ’t paviljoen de tied um in beroep te goan, bovendien lop d’r nog een hoger beroep teegn de ti’jdeli’jke vergunning, en zo oaln we mekare oneindig bezig. De jonges van de stichting “kadekraan Kampen” em reedn um een kiein feesien te bouwn de bouw van de krane is daadwarkeli’jk begunn, de tandwieln een belangri’jk onderdeel van de krane bin kloar, en now maar ‘oopn det ’t streevn ‘aalbaar is um in 2024 ti’jdens Sail de boel veur mekare te em.

En zo ziej maar weer d’r is altied wel wat in disse stad.

Appien Floep

Nick de Vries