’t Is maar wat in disse stad
· leestijd 1 minuut AlgemeenZakt in de geute, Kampen stun altied bekend as een sociale verpachter van ’t Kamper eiland. En now zal ’t zo weezn det ‘t college de boern ’t vel over de neuze willn ‘aaln um de pacht marktconform te maakn.
En dan zeg wet’older Bas Wonink namens ’t college ‘ier mee in te zulln stemm, onbegriepeli’jk, ze waarn d’r dus veur, maar vervolgens as de road íer terecht niet mee akkoord giet dan dreit die zelfde wet’older umme as een blad an de boom en dan zeg ie, road jullie bin helder ik zal in de andeel ‘olders vergadering teegn de ver’oging stemm.
Wie ’t nog begrep mag ’t zeggn, Is det now politiek van een hogere orde wat ik as Brunneper jonge niet snappe, of lot de road now ies een keer zien det ze ‘t ‘oogste bestuurs orgaan in de gemeente bin.
Maar gelukkig veur Henk Meuleman en zien Kamper eiland makkers die kunn veurlopig weer rustig sloapn. In ’t initiatief van Harrie Bruins van de VVD um een poging te doen um van de Burgel een prachtige grachte te maakn kan ik mien ‘elemoale vinn, want inderdaad ’t is niet anders dan een dooie sloot.
En ie kunn d’r best wat moois van maakn maar old d’r maar wel rekening mee det ’t een kladde geld giet kostn, en doar zal ’t dan wel weer op ofknappn want we em met zien alln vuul te veule wensn, en dan kump d’r van alles niks terechte.
Tenzij de road bereid is um keuzes te maakn, want aj mien now zolln vroagen wat zoj now liever willn die olde kogge of een mooi burgel, want as ’t niet allebei kan dan wist ik ’t wel.
Alweer een joar veurbi’j, en now niet bepoald een joar um met al te veule plezier op terug te kiekn met al die ellende in de wereld
Nardus Koster vrog namens de binnenstad ondernemers of de koop oamd nog wel zin ef, want ei’j ef geliek, aj op vri’jdag oamd op de Oldestroate loopn dan is ’t niet zo daj over de koppn loopn, dus tied um det ies ter discussie te stelln.
Wat wel prettig zol weezn det de winkels op zoaterdagmiddag in plaats van vijf uur tot zes uur los zolln bliem, want goat zelf maar ies kiekn rond vijf uur lop d’r nog behoorli’jk volk op stroate.
Alweer een joar veurbi’j, en now niet bepoald een joar um met al te veule plezier op terug te kiekn met al die ellende in de wereld, maar as we kort bi’j ‘uus oaln loatn we dan maar bli’j en dankbaar weezn met ons mooie Kampen woar ’t skier is um te leevn, en met det gegeevn oop ik det jullie allemoale zinvolle karstdaagn em of em ‘ad en wens ik een ieder veule ‘eil en zeegn in ’t ni’je joar.
En ik wete zeker ook in 2023 is d’r altied wel weer wat in disse stad.
Appien Floep.
