’t Is maar wat in disse stad
· leestijd 1 minuut AlgemeenZakt in de geute, en alweer is de N50 onderwarp van gesprek, want ’t ene ongeluk is nog niet of e warkt of de volgende kump d’r an.
En ’t is inmiddels wel dudeli’jk det d’r veurlopig gien over’eids geld is veur verbreding, maar d’r mut wel wat gebeurn, des een ding wat zeker is, en graag een bietien snel. Onlangs las ik een suggestie van iemand die zeeg gooi die passeerstrookn d’r uut, en ik denke det ’t elemoale zo gek nog niet is, d’r red altied wel vrachtverkeer en dan giet de snel’eid vanzelf noa 80 kilometer over ‘t ‘ele traject.
Een andere suggestie was maak d’r traject controle van, miskien ook wel een goed idee alleen jammer doar em we zelf weinig an want det brengt alleen maar geld in ’t laagien van de over’eid, maar ei’j wordt d’r wel een stuk veiliger van. Maar toch alles beter dan ’t idee van verkeers wet ólder Alber Holtland, um alle oprittn of te sluutn, dan is d’r elemoale gien verkeer meer, maar ’t zal ongetwiefeld ironisch bedoeld weezn want det is ’t enige wat we as gemeente kunn doen zeeg ie, ’t is een rijksweg en vaddes em we d’r niks over te vertelln.
Eindeli’jk is ’t dan zovarre de olde glasfabriek, de skandvlekke aan de Boom’aamt stroate, giet teegn de vlakte, maar ook det giet weer niet zonder slag of stoot, ’t zal ook niet zo weezn. Mut ’t nog weer een kladde extra centn kostn umdet de noast geleegn directeurswoning in andn is van de firma Mateboer, en de ziedmuure mut bliem stoan, ’t is allemoale wel makkeli’jk beslissn, maar ‘t giet wel weer um gemeensskapsgeld, en det ‘uus mut toch vandage of morrn ook van de been.
Ik vroage mien in alle gemoede of, woarumme ze niet as grote kerels an toafel goan zittn en dit probleem oplossn, weg met die bende, en now ies één keer deurbietn. Veur zovarre ik mien kan ‘erinnern ef Gruunlinks ooit ies een plan loatn maakn veur de invulling van det gebied, een plan wat d’r merakels mooi uutzag, loat ze det nog ies uut de onderste la ‘aaln en d’r nog ies een keer goed noa kiekn.
Maar ‘oe dan ook links umme of rechtsumme doe wat, en loat ’t niet zoas in Kampen zovake gebeurt zo’n gebied nog weer joarn braak loatn liggn. Want wie ’t nog wet tot maart 1969 was machinefabriek van Driel doar gevestigd, dus leg det terrein d’r al 52 joar verwaarloosd bi’j, ik bedoele maar.
Ak volgende moand an mien stukkien toe bin dan em we een ni’je friese burgemeester, as ie de zelfde inslag ef as onze old friese burgemeester Sybren van Tuinen, dan kump ’t wel goed. “Friesland boppe”.
En zo ziej maar weer d’r is altied wel wat in disse stad.
Appien Floep
