’t Is maar wat in disse stad
· leestijd 1 minuut AlgemeenZakt in de geute, zo stoj met een dikke jasse an op de skaasens, en een weke later, midden in de winter, kuj bi’jkans in de korte broek met de kop in de zunne zittn.
En dan kunn ze wel zeggn skaasens loopn verleer ie niet, maar aj det al joarn niet e doan em dan valt ‘t toch vies teegn, noa tien minuutn en een keer valln deedn mien alle spiern zeer, en bin ik maar gauw tuus an de koek en zopie (sukelamelk) e goan. Woar ik wel met plezier en met een bietien nostalgies gevuul noa eb stoan kiekn, en wat al joarn niet kon, det de kiedes in de stroate een glierbane e maakt ‘addn, woar ze met zien alln met veule plezier op an ’t glinderen waarn.
We bin met recht een stad woar we met zien alln trots op kunn weezn, we em de boel redeli’jk veur mekare, en toch bin we in de ofgeloopn joarn merakels verarmd. We waarn een garnizoens stad met kezannes, met militaire te’uuzn, met een mob complex op ‘t ‘aatland, d’r is niks van over. We waarn een universitaire stad met theologische ‘oge skooln, op de koornmarkt, an de Oldestroate en op de Breurweg, nog eempies dan is ook ‘ier alles weg.
Wi’j ‘addn een kunst academie, een theaterskole, een journalistn opleiding, en wat is d’r van over, elemoale niks. We ‘adden een IJssel academie, ook vertrokkn. De cultuur en ’t uutgoans leem vierdn ‘oogtij, maar vri’jwel alles is noa grote breur Zwolle e goan, en we em d’r merakels weinig veur terug e kreegn.
Veule van det alles is tot stand e koom in de tied det we van Tuinen íer as Burgemeester addn, een aristocraat uut Friesland, ik eb ‘m as jong bruukien van noabi’j mee e maakt, een echte regent maar een goeie bestuurder, en ik denke echt as ie later íer an ’t roer ad e stoan, dat ie ’t niet zomaar over zien kante ad loatn goan, en ‘m maar niet zo alles ‘ad loatn ofpakkn.
’t Was ook die zelfde burgemeester van Tuinen die veurkoom ef det die afgrijseli’jke deurbraakn van de Flevoweg tot an de Iesselkante dwars deur de stad d’r e koom bin, die brede Meeuwenbrugge en de brede brugge bi’j de Skoolstroate bin d’r nog een bliemt veurbeeld van.
Gien kwoad woord over de opvolgers van van Tuinen, want ieder veugeltien zingt zo ie gebekt is, maar ’t is an de gemeente road um in de loop van dit joar een profielskets veur een ni’je burgemeester te maakn want Bort Koelewijn giet met pensioen zeg maar, en as we now ies een soort burgemeester as van Tuinen terug kriegn, dan denk ik det we ’t weer goed veur mekare kriegn, en det mut ook, want d’r is altied wel wat in disse stad.
Appien Floep
