Afbeelding
Eigen foto.

’t Is maar wat in disse stad

· leestijd 1 minuut Algemeen

Zakt in de geute, de rijksdienst veur ’t cultureel arfgoed zit ons op de ‘ieln, de gemeente kreg nog zes moand de tied umme te beslissn of we det wrak van de Iessel Kogge die  geconserveerd wordt in Lelystad terug willn em in  Kampen.

En det is in disse muuili’jke tied best een dilemma, want de gemeente schat det we zo’n zes tot zeum miljoen euro neudig em um die kogge in een soort van Hanze museum ten toon te stelln. En loatn we eerli’jk weezn we kunn de centn op dit moment wel beter gebruukn, en ie kunn ze maar een keer uutgeem, en we bin zeker gien rieke gemeente. Welvaart is mooi maar welzijn van onze burgers mut in disse corona tied toch wel op de eerste plaase stoan, en ‘ier is veurlopig genog te doen.

En wat ook een woar’eid is as een koe, veurbeeldn te over, ie beginn dit soort projectn met zeum miljoen, maar veur daj kloar bin dan bi’j ’t dubbele kwiet, old doar maar goed rekening mee. ‘t Is disse road die d’r nog over mut beslissn, maar de uuteindeli’jke rekening kump tammee bi’j de ni’je borgemeester en bi’j de ni’je  road die volgend joar antreed op op ’t bortien te liggn, um in de beeldpraak te bliem.

’t Is miskien appels met peern vargeliekn, of wellicht wel een mugge met een olifant, maar in Almere organiseern ze volgend joar de Floriade, in de eerste begroting ging ’t um tien miljoen euro, ’t duurt nog een joar veur det ’t zovarre is, en ’t is niet te geleum maar de teller stiet op dit moment al op tachtig miljoen euro.

Veurige weke moandag stun ik op de Ni’jemarkt eem te proatn met mien kammeroad A3, kump wet’older Abert Holtland d’r an, jonges zeeg ie muttn jullie ies luustern, en ei’j wees op de muziektente, ik bin eem wat links en rechts an ’t peiln e west oe of de Kampenaar noa die tente kek, want ei’j mut nameli’jk e restaureerd worrn en det giet miskien wel ‘onder duzend euro kostn, maar we kunn ‘m netuurli’jk ook sloopn want d’r gebeurt toch zowat  nooit wat mee.

Wi’j stunn saamt, want as we e zeetn ‘addn dan waarn we allebei van de stoel of e valln.   Wij vroegn ‘m of ie soms de goedwies kapot ad, oe kuj ’t bedenkn, ei’j begun wel wat zoer te kiekn maar gelukkig mos ie eerli’jk toegeem, bi’j iederene die ie ’t evroagd ad kreeg ie de ‘andn niet op mekare veur sloop, en det is maar goed ook want die muziektente die ‘eurd bi’j Kampen net zo as de ni’je toorn bi’j Kampen  eurd, en die goj ook niet sloopn as de restaurasie een kladde geld kost.

En zo ziej maar weer d’r is altied wel wat in disse stad.

Appien Floep.