’t Is maar wat in disse stad
· leestijd 1 minuut AlgemeenZakt in de geute, ik zatte zo nog ies wat noa te denkn over de verkiezingn, d’r waarn toch wel een paar opvallende dingn, wat mien ’t meeste verbaasd ef is de uutslag van de PvdA in een stad van meer dan vieftig duzend inwoners nog gien duzend stemm, en slechts ene zetel, ik denke det ze zich doar nog ies goed achter de oorn muttn krabbn oe det now ef kunn gebeurn.
Christenunie is de grootste petij met zes zetels, maar in principe is det eigenli’jk niet zo, de grote winnaar bin de lokaaln, want d’r em in Kampen drie lokale petijen mee e doan, die bi’j mekare negen zetels em e ‘aald. Ik denke as d’r ene lokale petij mee e doan ad det ze miskien de tiene wel ‘aalt ‘addn, en dan waarn ze var uut de grootste petij e west. ’t Zal nog een klus worrn um d’r een college van te bakkn, now em ze gelukkig een ervaarn informateur an Remmelt de Boer, die ef die klus al vier keer e kloard dus det is ‘m wel toevertrouwd.
Van mien kameroad Derk de Vuurpiepe die behhorli’jk ingevoerd is in ’t politieke wereltien ‘eur ik nog wel ies wat, maar ei’j zeeg ook det ie ’t muuili’jk vun um een veurspelling te doen, ’t kan alle kantn uut, maar wat ’t meest in ’t gerede leg volgens Derk is de Christunie, CDA, één of meer lokaaln (die saamt de krachtn bundelen) en Gruunlinks, in weezn dus de zelfde saamstelling as ‘t ‘uidige college, bin ze d’r miskien snel uut, maar ook de SGP met vier zetels zal an de belle trekkn.
Ik bin merakels bli’j det ’t boerderi’jgien an de Suntekloazendiek de status van gemeenteli’jk monument e kreegn ef, ’t is toch ook grote zunde um det laaste stukkien van een eeuwn olde Brunneper geskiedenis te sloopn. Ik denke det de slogan “We bin ’t zat, d’r is al genog e sloopt in onze mooie stad” zo zachies an grond onder de voetn te kreg. Zo kriegn we ook weer een een stukkien nostalgie an de Iesselkante terug, ’t is de jonges van de stichting kadekraan noa elf joar toch gelukt um ’t veur mekare te kriegn, de klap is d’r op e geum de krane kump as maritiem monument in de oorspronkeli’ke staat terug, ook die ‘addn ze in 1969 nooit muttn sloopn, dan ‘ad ie net as in Middelburg, want doar stiet de zelfde, nog fier rechtop e stoan. In Zutphen stun d’r ook ene en die is ook onder de sloopers ‘amer verdween, ook die zolln ‘m graag willn ‘erbouwn maar doar kunn ze ’t niet veur mekare kriegn, det waarn overigens de enige drie die in Nederland e bouwd bin.
Ni’j college, ni’je road, ni’je kansn, en zo blef d’r altied wat in disse stad.
Appien Floep.
