Leugenbankien: ’t Is maar wat in disse stad
· leestijd 1 minuut AlgemeenZakt in de geute, ik ‘ad mien nog zo veur e neum um niet meer over de kogge te proatn, de road is nog steeds niet in stoat e bleekn um eensgezind een plekke an te wiezn, ’t old maar niet op. Alleent veur onderzuuk en expositie ef ‘t al meer dan een miljoen euro e kost, maar let op, d’r mut al weer vijf en zeumtig duzend euro bi’j, en we bin d’r zo zegt men nog lange niet, ’t giet waarskijnli’jk nog veule meer kostn, en dan bin we miskien nog gien steek varder. En now weet ik wel daj gien appels met peern maggn vergeliekn maar ak now kieke dat de voedselbanke is ver’uusd noa Iesselmuudnen en det d’r steeds meer gezinn bi’j koom veur wie die voedselbanke ‘oog neudig is um de weke deur te koom, ach loat maar, oordeel zelf. Arend Hengeveld nog zol leem en wet’older was dan gebruukn ie in dit soort gevalln een uutdrukking die mien altied bi’j e bleem is (’t is de martelgang van kromme Lindert).
De laaste tied proat ik nog wel ies met mensen die vinn det ‘t ‘oog tied is um in Kampen een soort denktenk in te stelltn, een antal betrokkn burgers die de gemeenteroad gevroagd en ongevroagd een advies kunn geem op belangrijke vroagstukkn, een poging um de kloof tussen burger en politiek wat vardr te dichtn. Um ies een veurbeeld te nuum, d’r loopn een paar betrokkn burgers met een geweldig idee rond, zonder naam te nuum, jullie kenn ze vast wel, ’t is ooit al ies joarn geleedn ter spraake e west, ’t werd toen “de Luikse variant” e nuumd. Inmiddels bestiet iets dergeli’jks in Nijverdal en Harlingen, ’t Verdiepn van de deurgaonde weg an de overkante van de Langebrugge, een onder deurgang, vanof de Spoorstroate noa beneedn en an ’t ende van de Spoorkade richting Pieterhoeve de grond weer uut, vanof ’t station en van de Iesselmudeger kante ei’j dan rechtstreeks en prachtig contact met ’t stadsfront en de rivier, de stoplichtn an die kante kunn dan verdwienn want d’r is dan gien krusend of ofsloand verkeer meer.
Wat kuj doar dan niet een prachtig gebied van maakn wat de stadtoeristische trekpleister ten goede zal koom, maar dan mut de road wel andere keuzes maakn Maar veurdet ’t ‘ier tot iets concreets kump is Zwolle ons al veur, die goan ’t nameli’jk gewoon doen, die nuum ’t burgerberaad. Mensen kunn d’r zich veur anmeldn, ’t mut een bietien een ofspiegeling van de saamleving worrn, ik bin beni’jd of ze ’t van de grond of kriegn in Zwolle, wellicht kan Kampen d’r zien veurdeel mee doen, want we ‘oevn’t niet neudig is niet opni’j ’t wiel uut te vinn.
En zo ziej maar weer, d’r is altied wel wat in disse stad
