’t Is maar wat in disse stad
· leestijd 1 minuut AlgemeenDe road ef zich eindeli’jk uut e spreukn over de plekke woar de kogge mut koom, “de Koggewarf”, zei ’t met een uuterste krappe meerder’eid, zestien stemm veur en vijftien teegn, zelfs teegn stemm vanuit de coalitie petijen, ende road een ofspiegeling van de saamleving is dan gef det metene een bietien weer oe ’t met de draagvlak in de saamleving zit, zol ’t niet merakels interessant weezn um te weetn oe det now precies zit, “burger participatie” nuum ze det. En now em ze op de warf met de wet’older gebakkies zittn eetn op de goeie ofloop, en det is wel lekker, maar over ’t financiele plaatien is nog niks bekend, endet danig uut de klauw giet loopn dan kan ’t in de road ook maar zo vijftien, zestien worrn.
Ak goed geinformeerd bin viern ze dit joar de vieftigste editie van de Kamper -Uitdaagn En de eerste Kamper -Uitdag zit d’r al weer op, ik eb geneutn van ‘t stroat muzikantn festival. Pette diepe of veur de mensn die zich ieder joar weer inzettn um d’r een geslaagd evenement van te maken. En d’r volgn nog een aantal thema’s, achter éénvolgens, olde ambachtn, Dreiorgels, Kampen textielstad, kampen en kunst, enlaaste surprise. Maar toch bin d’r ook een aantal leuke dingn in de loop der joarn verdween, weet ie ’t saamt nog, spiedbootraces op de Iessel, parachute springers die landn op de Iesselkante, wielerparcours over de oldestroate, en vuurwark op de laaste oamd.
En wat ook jammer is det “Oldtimerdag Kampen” bi’j gebrek an vri’jwilligers ter ziele is e goan, veertien joar lang was ’t een geslaagd evenement, ondersteund deur de SPK trok ‘t een kladde volk. Ik kenne trouwens iemand die ’t graag opni’j zol willn oppakkn, maar die kan ’t niet alleen die ef ‘ulp neudig, oldtimer lief’ebbers vuul ie oe geroepn um mee te warkn um de oldtimerdag opni’j leem in te bloazn, reageer maar en dan zal ik d’r veur zorgn daj in contact koom met mekare.
Noa de vekansie is ’t zovarre ze beginn te bouwn an de kadekrane, maar det giet nog wel eem duurn want ’t is ‘oofdzakeli’jk vri’jwilligers wark, maar det ie d’r kump is zeker. De klinknagel actie tijdens Sail ef een mooi bedrag op e levert, de jonges em over ‘t algemeen leuke reacties ‘ad, ’t is mooi det d’r toch een boel mensn bli’j bin dat det maritieme monumentvan oalds weer teug kump an de Iesselkante. D’r giet ook nog een Tijdcapsule mee in de krane met een bult informasie o.a. alle naam van de sponsors, ook die van de klinknagel sponsors, en doar wordt nog de neudige andacht an e skunkn. Veur zovarre aj met vekansie goan, veule plezier, en kom veilig weer in Kampen want d’r is altied wel wat in disse stad.
Appien Floep
