Leugenbankien
· leestijd 1 minuut AlgemeenZakt in de geute, ik eb ies ‘t ‘ele ver’aal e leezn over de sportcampus die in de buurte van KHC mut verskienn. Wat doar allemoale al niet overlegd is, maar kenneli’jk wordt d’r niet in e goan op de visie van KHC, want doar vinn ze gien geheur bi’j hun bezwoar det ze die grote pakeerplaase niet willn verliezn. Now ef de gemeente d’r een projectleider van buutn op e zet woarvan deur KHC e zegd wordt die man is niet te beweegn, die luustert kenneli’jk alleent maar noa ‘m zelf en vaddes noa niemand en det is toch ampart, in een tied waarvan we de mond vol em van burger participasie, maar ik ‘eb inmiddels begreepn det ie weg is.
Maar uuteindeli’jk is ’t de gemeenteroad die ’t laaste woord ef, en die ef de zaak op de lange baane e skeumen en dan maar ofwachtn of die wel ooge ef veur de bezwoarn en nog ies een keer met allemoale um de toafel giet zittn. Toch gebeurn d’r ook wel dingn in de stad woar aj bli’j van worrn, muj ies goan kiekn noa ’t gebouw van de HBS, de “Ogere Borger Skole” an de eerste Ebbingestroate, hulde veur die jonges die doar an warkn. En dan ek ’t alleent nog maar over de buutnkante, wat is die merakels mooi e worrn, ik neme an det ook de binnenkante net zo wordt, en det doar straks veule mensn met plezier kunn woonn, en zo zie maar d’r kan best van alles aj ’t maar willn. Eindeli’jk is d’r in de Boomaamt stroate ook overeenstemming over ’t bouwplan, jammer det d’r gien ondergrondse parkeerplaase kump, maar gezien de kostn is ’t wel te begriepn. Alleent bin ik beni’jd wat ze op de plekke van de gesloopte villa goan doen, en of ze de ooit gemaakte ofspraakn noa koom.
Ik eb weer geneutn van Koningsdag, al ‘oewel d’r een kladde ver’anderd is, um ies een paar veurbeeldn te nuum, gien revellie meer, gien kienderzang meer, gien taptoe meer, gien vuurwark meer, en toch zorgn de oranje verenigingn d’r ieder joar weer veur det ’t gezellig is, en det d’r in ieder geval bi’j ons in Kampen een gevuul van saamhorig ‘eid is, en det is ‘eel belangri’jk in disse reurige tied.
’t Eurd bi’j ’t leem, maar toch skrik ie iedere keer weer as d’r onverwachs een advertensie in de krante stiet det d’r een bekende is overleedn. Ik eb goeie ‘erinneringn an Jan Wieten, op verskillende frontn mee e maakt in de politiek, een goeie bestuurder, met oge veur de onderkante van de saamleving. ’t Mooie van Jan was det ie maling ‘ad an etikette, iederene ad nog een stropdasse veur en een colbert an be’alve Jan. En zo ziej maar weer goed ni’js en treurig ni’js d’r is altied wel wat in disse stad.
Appien Floep
