’t Is maar wat in disse stad
· leestijd 1 minuut AlgemeenMastenbroek is een middeleeuwse polder binnen de gemeentes Zwartewaterland, Kampen en Zwolle, en maakt deel uut van het nationaal landschap IJsseldelta. Het is een combinatie van agrarisch gebied, natuur en cultuur ‘istorie. De Mastenbroeker polder werd in 1999 an e markt als cultuur historisch zeer waardevol gebied in de nota “Belvedere” van de toenmalige ministeries van Cultuur, Ruimtelijke Ordening, Landbouw, Natuurbeheer en Waterstaat. Det betekent det ’t gebied een bepoalde status ef, en det is maar goed ook, want anders was ie allange ‘alf vol e bouwd, maar men blef ’t maar probeern, now weer een poging um ‘m vol te plempn met grote windmeulns.
Verantwoordeli’jke bestuurders wees toch eindeli’jk ies standvastig en blief met oe vingers van die eeuwn olde polder of, ei’j ef niet veur niks de Belvederestatus. De Mastenbroeker polder leg in ‘t centrum van de drie gemeentes woar in totaal twee ‘onderd en veertien duuzend mensen woon, mag dan veur al die inwoners asteblief die cultuur ‘istorische polder bliem zoas ie is.
Joarn geleedn is d’r ies een poging e doan um Kampen weer met een C te goan skriem, en det is toen in de kiem e smoord, maar now ek in de wandelgangn ‘eurd det ‘r opni’j belangstelling is um det ies weer op de agenda te kriegn, en doar nog ies een keer serieus over noa te denkn, en eigenli’jk is det elemoale zo gek nog niet, we bin uuteindeli’jk ook niet veur niks al eeuwn lang een trotse Hanzestad. En boom dien in de Koggetied waarn we ook Campen met een C, de spellings ‘erziening van de Nederlandse taal uut achtien ‘onderd en vier is ’t moment e west det de C in een K is veranderd en werd ‘t Kampen. Aj ies langs de tweede Ebbingestroate koom muj veur de oardig’eid ies kiekn wat d’r met grote letters op det wooncomplex stiet, oe zeggn ze det ook al weer, goed veurbeeld dut goed volgn, ik bin merakels beni’jd of ’t een vervolg kreg.
’t Liekt d’r op det de gemeente met twee moatn an ’t meetn is, woar an de ene kante veur tuinderswoningn in de Koekoek en bedrijfswoningn an de Haatlanderdiek ‘oek Kievitstroate een regeling e troffn is, worrn twee olde mensn an de Hogeboom in Iesselmuudn e dreigd ‘t ‘uus uut te zettn onder een dwangsom van veertig duzend euro. En now mut d’r uuteindeli’jk een rechter an te passe koom um ’t veurlopig uut te stelln, ik worre ‘ier misseli’jk van, de over’eid die d’r veur de burgers mut weezn en niet umme gekeerd, det de burgers d’r veur de over’eid bin. Woar em we eigenli’jk een burgemeester veur, doar wol ik wel ies graag een verkloaring van ‘eurn, want dit liekt wel ‘eel arg veule op arrogansie van de macht. En zo ziej maar weer, d’r is altied wel wat in disse stad.
Appien Floep
