’t Is maar wat in disse stad
· leestijd 1 minuut AlgemeenZakt in de geute, ik weet niet of ’t jullie wel ies is overkoom, soms leezie klachtn van mensn in de krante en dan denk ie, och ’t zal wel, tot ’t oe zelf overkump. De bewoners van de La sa blonierekade, klaagn al joarn over de overlast en ’t gevaor van die grote landbouw voertuign, de bocht noa de Boom’aamtstroate is vuus te krap veur die grote joekels Veurige weke kom ik op de fietse uut de Boomaamt stroate richting Iesselkante, kortumme ik bin mien kepot e skrukkn, ik 5 secondn eerder was e west dan was ’t niet meer neudig e west dan ‘ad ik dit ver’aaltien niet meer kunn skriem. En now bin ik d’r maar ene, maar ‘onderdn Pieter Zantien neem dageli’jks die bocht, ie muttn d’r niet an denkn, leems gevoarli’jk. Conclusie, de gemeente wet dit al joarn, muuili’jk muuil’jk, maar doar loatn ze ’t bi’j, doe d’r wat an, ’t mut niet morrn op e lost worrn maar vandage. En dan te bedenkn det d’r ook nog ies groot onder’old an de Meuln brugge an kump die moandn giet duurn met alle gevolgn van dien, ik oale mien ’arte vast.
‘oe zol ’t toch weezn met boer Jaap Bos van ’t Noordeinde, van wie op onverkloarbare wieze drie en zestig koeien bin dood e goan noa aanleg van de Reevediek. Iederene was begoan met ‘m, alle krantn skreem d’r over, de road, de provincie, zelfs tot in de tweedekamer bin d’r vroagn over e steld, maar zodra ’t gien ni’js meer is dan is ’t ook gien ni’js meer en dan ‘eurie d’r ook niks meer van. Want onderzuuk ef nooit wat uut e weezn, en toch blef ’t een roadsel want die koeien goan toch niet zomaar dood. Is ‘t ooit wel ies dudeli’jk e worrn wat now echt de oorzaak is e west is, ik weet ’t niet, wie ’t wet mag ’t zeggn.
De kogel liekt now eindeli’jk deur de karke te weezn wat betreft de lokasie veur de Kogge, althans’t an ’t college leg, of de road d’r in meerder’eid ook zo over denkt is nog maar de vroage. Want ’t bedrag wat ’t college nuumt de drie punt twee miljoen, det kuj wel vergeetn, goa d’r maar gerust van uit det ‘t meer dan klein bietien meer giet kostn. En de impressie van mogeli’jk zo’n modern gebouw op de koggewarf, oe kunn ze ’t bedenkn. Ook met het antal extra parkeerplaasn wat neudig is sloat ’t college volgens mien de planke volledig mis. Zonder te oordeeln, d’r is nogal wat reuring in de saamleving over de Kogge, burger participaasie stiet ‘oge in ’t vaandel, gemeente Kampen doe d’r wat mee. En zo ziej maar weer d”r is altied wel wat in disse stad.
Appien Floep.
