’t Is maar wat in disse stad
· leestijd 1 minuut AlgemeenZakt in de geute, toch jammer det de stichting Stads Herstel d’r mee e stopt is, ze em in al die joarn merakels goed wark e doan veur de stad, maar gelukkig em ze een perfecte opvolger e vunn die een deel van ‘un wark over nemp. De ‘Istorische vereniging “Jan van Arkel” de club die mien noa aan ‘t ‘arte lig, giet een aantal dingn op zich neem, van de Stichting Stadshertel de muur reclames, van nog een andere stichting de strukel steen, en in een eerder stadium em ze de Kampertaalkringe al onder ‘un ‘oede e neum. Kortumme Jan van Arkel verdient ’t um te gruuien, ze geem geregeld een prachtig en waardevol blad uut, zeer de muuite weerd umrechtgeaarde kampenaar lid van die club te worrn.
Eij’t ook e leezn veurige weke in de Brug, ’t ver’aal van old Burgemeester Jan Oosterhof, ei’j deed ’n daggien Kampen en toen wier ‘m verteld det ie vernuumd was en det zien name stun op ‘ekkien rond een fontein in de grachte teegn over ‘t ‘ertekamp. En netuurli’jk is ie d’r eem goan kiekn, maar det ‘ad ie beter niet kunn doen, ’t ziet d’r niet uut, eij ’ef ook e vroagd an ’t college of ze det ‘ekkien um die fontein met zien name asteblief weg willn ‘aaln
Ik bin ook ies goan kiekn, muj ook ies doen, dan kuj niet anders dan die man groot geliek geem, zo erie gien burgemeester. ’t Zelfde geld overigens ook veur old burgemeester Henk Kleemans, die is niet varder e koom dan zien name op een puntien op ’t kampereiland, terwijl de beste man zelfs ereburger is van onze stad, oh en dan vergeet ik nog Bort Koelewijn volgens mien ef die nog elemoale nanns zien name op stoan. Van alle burgemeesters van veur Kleemans is een stroate of een plein vernuumd, ’t wordt ‘oog tied det de stroatnaam commissie,die nog bestiet, zich ‘ier ies over giet buugn, en met een fesoenli’jk advies noa de gemeenteroad giet, want die mensn verdien meer dan een ‘ekkien of een puntien.
Ik bin te veule democraat um commentaar te geem op een gerechteli’jke uutspraak, maar triest is ’t wel, det die twee olde mensn doar an de ‘Ogeboom an de overkante van de Iessel ‘un ‘uus uut muttn, ád det now echt niet anders e kunt. ’t Zol de gemeente siernze d’r in ieder geval veur zorgn det die mensn niet op stroate koom te stoan, want wie wast ‘ier now zien ‘andn in onskuld, deze mensn em gien misdoad e pleegt d’r bin fouten e maakt, loat now maar ies zien det de burgers d’r niet veur de over’eid bin, maar det de over’eid d’r is veur de burgers. En zo ziej maar weer d’r is altied wel wat in disse stad.
Appien Floep
