’t Is maar wat in disse stad.
· leestijd 1 minuut AlgemeenZakt in de geute, onlangs was ik getuuge op een verjoardag van een oeverloze discussie over de zomer en de wintertied, veur standers en teegnstanders, en det zal altoos wel zo bliem.
En in Europa bin ze ’t d’r ook lange niet over eens, ik eb begreepn det Duitsland als ze de zomer en wintertied op’effn veur midden Europese tied kiest en det skeelt dan een uur met onze klokke, en det is in de praktijk best wel lastig.
D’r is ook een alternatief veur e stelt en det liekt mien de oplossing, en uuteindeli’jk waarn ze ’t d’r op de verjoardag ook over eens, zet de klokke volgend veurjoar in alle landn een ‘alf uur veuruut en loat ‘t vervolgens zo, dan komie zowel de veur als de teegnstanders tegemoet, polderen nuum ze det en doar bin wi’j in Nederland ‘ardstikke goed in.
Ik mag graag de lokale politiek volgn maar wat d’r now in één van de lokale petijen ofspeult is te gek veur woordn, maar in‘oudeli’jk goa ik d’r maar niet op in, liekt mien gien goed idee.
Maar aj uut de petij e zet worrn um zo ‘t liekt gegronde reedn daj dan als éénling varder kunn als Kampen Lokaal det mos niet kunn, is det de saamleving dienn, of is det de eigen pottemenee dienn, ’t wordt ‘oog tied dat de spelregels op dit punt an e past worrn.
De winkeliers in de binnenstad beginn zich toch een bietien te reurn now ’t d’r op liekt det de road giet kiezn veur een ander parkeerbeleid, die ander’alf uur die aj overdag parkeern maggn in de binnenstad det kump niet goed, det giet de ondernemers een kladde geld kostn.
En ook betaald parkeern tot soams tien uur, is det now echt neudig. Ik bin d’r niet bli’j mee maar ik éure steeds meer geluudn van ik zuuke ’t wel annes anders, Dronten Wezep ook een uutgebreid winkelbestand en gratis parkeern. Em we ook nog een oppositie in de gemeenteroad, woarumme ‘eurn we die niet, Kampen mut de geweldigste Hanzestad van de wereld worrn, maar dan muj de mensen niet bi’j veurbaat weg jaagn maar ze met open arms ontvangn.
Als ik mien volgende stukkien skrieve dan zit Karst in old Kampen d’r al weer op, ni’je ideeen ni’je route, ik bin beni’jd, ik bin d’r ieder joar te vinn en geniete d’r van det zoveule mensn d’r op of koom. D’r is maar ene spelbreker mogeli’jk en det is ’t weer, maar oopn det de weergoden ons goed gezind bin.
Als Brunneper jonge dut ’t mien merakels goed det de lanteern bij de ingang van ’t veurmalige Bark terrein weer brand, ’t is niet alleent maar kommer en kwel, d’r gebeuren ook nog leuke dingn in Kampen, want zo ziej maar weer d’r is altied wel wat in disse stad.
Appien Floep
