’t Is maar wat in disse stad
· leestijd 1 minuut AlgemeenZakt in de geute, d’r is be’oorli’jk wat reuring in de stad, burgerparticipatie nuum ze det, mooi toch det d’r zoveule betrokkn burgers bin,’t Is ook niet niks van wat aj zoal mee kriegn.
Neem alleent al de organisaties die de vier grote evenementn veur ‘un rekening neem, die de gemeente waarskouwnde kostn op ‘t nivoo koom van wat de gemeente veurneems is dan kon ’t wel ies gebeurt weezn met kerst in old Kampen, ‘Anzedaagn, Sail, ’t culturele festival, de KOV en wie wet nog meer. Allemoale evenementn die kampen op de kaarte zettn, die goj toch niet de nekke ummedreien.
Wat ook skrikkn is is de brief van de vriendn van Kampen, die bi’j de gemeente in het kader van de WOO cijfers em op e vroagd over de inhuur van externe buroos, en det ging over de veurbereidingn van de Kogge die al dan niet teug kump en de opening van een sportcampus. En wat blek d’r is inmiddels ruum zeum ‘onderd en vieftig duzend euro uut e geum, en ze bin nog gien steek varder.
Gien mense is onmisbaar maar toch bin d’r mensn in de lokale saamleeving die aj muuli’jk kunn missn, ene doarvan is Theo van Mierlo, historicus in hart en niern, en als d’r ene de geschiedenis van kampen kent en ’t op een bizundere meniere en met een heldere stemme veur ’t voetlicht kan brengn dan is ’t Theo, ik neeme mien de pette d’r veur of.
En ei’j giet now noa 33 joar dienst in archief en museum met verdiend pensioen, maar gelukkig zoas ie zelf zeg, blef ie tijdeli’jk in Kampen woon, maar de ervaring ef al e leerd dat det tijdeli’jke ruum te interpreteern is. Ik oope det ie breed inzetbaar blef, en det ie veurlopig niet achter de geraniums giet zittn.
Veurige weeke zat ik ies eem wat olde plaaties te bekiekn en toen kwam ik een foto van de “Hagenpoorte” teegn, wat is ’t toch grote zunde, dat een van de mooiste poortn die we ‘addn, in 1894 e sloopt is. Goa zelf det plaatien maar ies bekiekn en dan denk ik daj ’t saamt met mien eens bin. Ik weete det droom bedrog bin maar laatst droom ik det d’r een antal mensn ’t idee op e pakt addn um die poorte te herbouwn,’t met de kadekrane kan zeegn ze dan mut ’t met die poorte ook kunn, ik neme and et de tekeningn in ’t archief nog beskikbaar bin. Wat mien betreft mag mien droom warkeli’jk’eid worrn.
Want ‘t is niet allemoale kommer en kwel, aj willn dan kan d’r veule de olde ‘Oger Burger Skole en de Stads ge’oorzaal bin weer plaaties die rechtdoen an ’t cultureel arfgoed van onze mooie stad,
En zo ziej maar weer d’r is altied wel wat in disse stad.
Appien Floep
