’t Maar wat in disse stad
· leestijd 1 minuut AlgemeenZakt in de geute, nog eem terug te koom op de veurige moand, ik wier e beld deur iemand die graag wol weetn of de Ellegesteege, ’t dialect woord was van de Heilige steeg. Now det liekt mien wel veur de ‘and liggn, maar woarumme of ooit die steege de name ef e kreegn van Heilige steeg, ik eb ’t niet kunnen achteraaln, dus wie ’t wet mag ’t zeggn. Wat ie ook nog zeeg mien opoe woondn vrogger in de Ellegesteege, en noast ‘aar ‘uus was een doodloopnd steegien wat wi’j de Peere zien gang nuumdn, kuj mien dan wel vertelln wat doar an ten grondslag lag, now en det ek wel e vunn. Vanuut Deurne kwam John Baptiste van der Perre noa Kampen en die begun een tuinderi’jgien achterin det steegien, Maar “John van der Perre” was natuurli’jk niet iets wat pastn binn de cultuur van de Ellegesteege, doar koj op wachtn dus det werd al gauw “Jan de Peere”, en zo werd ’t steegien uuteindeli’jk “de Peere zien gang” e nuumd.
Jonges ’t niet niks wat onze wet’older van de centn Bernhard van den Belt zeg die een bedrag van tussen de 9 en de 15 miljoen mut bezuunign, oj een emmer leeg gooin. En ei’j dut doarbi’j een antal krasse uutpraakn, de ‘ele saamleving zal d’r piene an liedn, maar d’r bestoan gien ‘eilige ‘uusies, alles wordt teegn ’t licht oaln, ook de keuzes die in ’t verleedn e maakt bin, “maaaar”, let op, ei’j giet de bewoners een noadrukkeli’jke stemme geem. Dus ’t wordt een spannend veurjoar, we goan met belangstelling kiekn wat d’r uut kump van zien krasse taal.
Veurige weke viel mien oge op een stukkien in de Brug van een bejoarde stadgenoot, die gewend is met zien vrouwe noa een senioorn middag in de binnstad te goan, maar die deur ’t gemeenteli’jke parkeerbeleid e dwungn wordt um achter de geraniums te goan zittn. Ei’j zeg det drie uur parkeern net genog is um uut en tuus te koom, maar ander’alf uur betekent, of in de tussentied noa de parkeermeter, (woarvan ik eb begreepn det bi’jvulln niet de bedoelig is) of een boete van 129 euro riskeern. Gelukkig bin ik niet de enige die vindt det de gemeente een ondeurdachte beslissing ef e neum, ander’alf uur parkeern is echt veur een ‘eleboel mensn te kort in onze langgerekte binnstad, of ’t now um een bezuuk an een senioorn middag, een posien winkeln, of wat anders giet, d’r is niet goed over noa e dacht. Ik bin dan ook arg beni’jd wat deze mensn veur antwoord van de gemeente kriegn. Ik mag liedn det de roadsleedn de reacties e leezn em in de Brug want det is burger partisipasie in optimaforma want doar bin jullie toch zo van. En zo ziej maar weer, d’r is altied wel wat in disse stad.
Appien Floep
