’t Is maar wat in disse stad
· leestijd 1 minuut AlgemeenZakt in de geute, alweer een vereniging die de piepe an Maartn mut geem deur gebrek an bestuursleedn, de Brunneper Oranje Vereniging, die meer dan ‘onderd joar ef bestoan.
’t Is toch grote zunde, maar zo veur de laaste keer revellie in Brunnepe met Koningsdag. Maar ’t overkump steeds meer verenigingn,’oe kump det toch, is d’r now in ’t ele Brunnepe gien ene meer die zich veur disse mooie club in wil zettn, ik kan ’t mien eigenli’jk niet veurstelln. We maakn d’r op Koningsdag een knal feesien zeidnn ze, maar ’t was wel een knal feesien met een rouw rantien.
Ik weete niet of jullie det wel ies eurn op radio Oost, en dan bedoel ik de reclame van de activiteitn die in Kampen plaatsvindn, een mooi gebaar, maar woar ik mientaalfriek an store, dan em ze ’t over “Kampe” en “IJsselmuide”, zeg ’t dan of in ’t dialect of zeg netties KampeN en IJsselmuideN, ik mag liednze ni’je opnames maakn det ze ‘ier ies een bietien andacht an skenkn.
En weer bin we bli’j e maakt met een dooie musse, de centn die waarn veur bestemd um de verbreding van de N50 te realiseern bin deur de BBB blunder in rook op e goan, det kriej d’r van aj 25 uur achter mekare vergadern. Maar ik bin ’t toch ook wel eens met een ieder zeg ’t is niet alleen de weg die onveilig is, ’t bin ook de autobestuurders. Aj toch noa goan det d’r ‘alf april een grote verkeers controle is e west ter ‘eugte van Zalkerbroek op de N50, en det ze doar zowat zestig bekeuringn uut e kreem em veur ’t gebruuk van de telefoon, woar zit dan ’t grootste gevoar, now oordeel zelf maar.
D’r lig een geweldige plan veur de invulling van ’t Gotisch ‘uus, een pand uut 1500, want wordt ’t niet ‘oog tied det ‘ier iets mee gebeurt, muttn wi’j ons als monumentn stad niet skaam det we det unieke pand zo lange leeg em loatn stoan. Jan Liefting ef d’r een indrukwekkende bestemming veur bedacht, een ‘erinnering an de Kamper skilder “Hendrik Avercamp” ook bekend als de “Stomme van Campen”. Monumentn bezit is eigenaar van ’t pand, wil d’r twee miljoen euro insteekn veur de renovasie, en de Cas stelt een ton beskikbaar, en van de gemeente wordt een bi’jdrage e vroagd van ‘onderd vieftig duzend euro. En mocht d’r in de road een discussie ontstoan over de dekking dan eb ik wel een veurstel, neem ofskeid van een domme investering en verkoop det pand van CenA, want wat muj d’r mee, en steek die zes en ‘alve ton in ’t Gotisch ‘uus, det is een zinvolle investering want doar zettie Kampen mee op de kaart.
En zo ziej maar weer, d’r is altied wel wat in disse stad.
Appien Floep
