’t Is maar wat in disse stad.
· leestijd 1 minuut AlgemeenZol ‘t now toch echt de laatste keer weezn daj op oldejoarsoamd vuurwark of kunn skietn, wetteli’jk gezien wel, maar wat ef ’t now veur zin um vuurwark in Nederland te verbiedn aj ’t over de grens in Duitsland en in Belgie gewoon legaal kunn koopn, is d’r dan iemand die de illusie ef det ’t volgend joar stille is op oaldejoarsoamd, en det de vuurwark liefhebbers achter de geraniums goan zittn. En boomdien ‘oe wi’j det op oldejoarsoamd ‘andhaavn, in elke stroate in Nederland een pliesie agent Gelukkig valt carbied skietn met de melkbusse niet onder ’t vuurwark besluut, zodat we de tradisie in Kampen in ere kunn oaln, en det giet now d’r een aktief skuttersgilde is al joarn een stuk beter en georganiseerder dan vrogger.
D’r is zoals al joarn weer merakels veule te doen over de N50, Ik riede nog wel ies over die weg, maar eerli’jk gezegd ik vuule mien eigenli’jk nooit echt onveilig. Maar det d’r wat gebeurn mut det is wel dudeli’jk, maar veur det ’t een vierbaans weg is zal d’r nog wel ‘eel wat water deur de iessel stroom. Maar over’eid wees creatief en probeer ies wat, gooi veurlopig die in ’aal strookn d’r maar ies uut, want vake ziej det d’r op die in’aalstroke een stroale gas e geum wordt en dan passeern ze een paar auto’s, en an ’t ende van de stroke muttn ze d’r weer tussn kroepn. En aj det doen dan wordt ie met al det vrachtverkeer vanzelf een 80 kilometer weg, oef ie vaddes niks veur te doen, want dan is ie elemoale twee baans en dan kuj ook niet meer in’aaln en dan wordt ie miskien wel zo veilig det ‘t niet meer neudig is um d’r een vierbaansweg van te maakn.
Eindeli’jk is ’t dan zovarre in Lelystad bin ze kloar met de Iesselkogge, ei’j giet now noa Zwartsluus veur restaurasie, en ’t stiet now wel vast als ie kloar is det ie in Kampen kump. Ook veur al diegenen die al joarn negatief e west bin en die ‘m als brand’olt en olde plankn em of e skildert, bekiek ‘t now ook ies een keer van de positieve kante. Uuteindeli’jk em wij onze mooie stad te dankn an ons rieke Hanzeverleedn, en loatn we doar dan ook maar een bietien trots op weezn, en wat ook nog speult, Kampen ‘oeft ’t niet allemoale alleen te betaaln, Rijkswaterstaat en Rijksdienst veur Cultureel Arfgoed doen ook geld in de pot.
Mien pette giet diepe of veur Jan Liefting en al zien vri’jwilligers, “Kerst in oud Campen” wat een prachtig evenement.
Ik ‘ope det jullie allemoale zinvolle karstdaagn em ‘ad, en veur ’t ni’je joar wens ik een ieder veul ‘eil en zeegn. En ook in 2026 is d’r vast en zeker wel weer wat in disse stad.
Appien Floep
