’t Is maar wat in disse stad
· leestijd 1 minuut AlgemeenZakt in de geute, een vervelende uutspraak van één van onze wet ólders. Wet’older Bas Wonink over ’t Gotisch ‘uus an de Oldestroate, ei’j zeeg Kampen reserveert gien geld veur dit monument. We bliem wel met mekare in gesprek, maar we doen gien ‘arde toezegging. De verbouwing giet veule geld kostn, det is dudeli’jk, want ’t gebouw stiet al van of twee duzend negen leeg en d’r is nooit wat gebeurt. Stichting Monumentenbezit die eigenaar is wil 2 miljoen investeern um ’t monument weer zien olde glorie terug te geem.
En now vroagn ze van de gemeente Kampen een éénmalige bi’jdrage van ‘onderd vieftig duzend euro, en een structurele bi’jdrage van vieftig duzend euro per joar. En det de gemeente doar muuite mee ef det kan ik ‘eel goed begriepn, doar zulln ze een andere oplossing veur muttn vinn, maar die éénmalige bi’jdrage veur dit monument uut de vijftiende eeuw ofdoen met zo’n antwoord is onze monumentn stad on waardig. Maar gek genog is Wonink niet de monumentn wet’older, nee de monumentn wet’older is Richard Boddeus, dus veur em ligt d’r een skone taak als vak wet’older um zien uuterste best te doen um ’t Gotisch ‘uus zien oorspronkeli’jke status terug te geem, en nog veule meer zien best te doen um de invulling die ze veur oogn em, ‘erinering aan de Kamper skilder Hendrik Averkamp, te realiseern. Woar Jan Liefting zich ‘ardstikke druk veur maakt, en als die zich argns in vaste bet dan loat ie niet zo gauw meer los, ik rekene d’r dan ook op det ’t uiteindeli’jk allemoale goed kump.
Ik bin beni’jd wat d’r uuteindeli’jk terechte kump van ’t feest wat ze veur oogn em als Kampen in 2027 800 joar bestiet, veurlopig giet ’t budget terug van ander ‘alf miljoen noa zeum en álve ton. Amsterdam bestiet in dit joar 750 joar, en die stoan doar ook bi’j stille, die viern ook feest. Maar als ’t an onze burgemeester leg, die wil Amsterdem overtroevn, wi’j muttn d’r in Kampen nog een skeppien boom op doen zeeg ie, zol ie denkn det ’t geld ‘ier an de boom gruuit ?
Dan trekkie wel een geweldige grote broek an, ie kunn ook kiezn veur een wat kleinskaliger feessien. ’t Is nog lange niet zovarre, d’r zal nog genog discussie e voerd worrn, en water deur de IEssel stroom, maar de ervaring ef al vaker e leerd det d’r genog Kampenaarn bin die aj ze d’r maar bi’j betrekkn zich um niet wiln inzettn um iets te organiseern zonder det ’t metene een kladde geld kost. Aj oe doargemeente now ies op focussen dan zet ie Kampen ook op de kaarte als een stad um trots op te weezn, zonder oe te ‘oevn meetn an Amsterdam.
En zo ziej maar weer, d’r is altied wel wat in disse stad.
Appien Floep
