Leugenbankien: ’t Is maar wat in disse stad
· leestijd 1 minuut AlgemeenIn 2027 bestiet Kampen acht ‘onderd joar, goed veur een feesien, ’t college ‘ad d’r anvankeli’jk ander ‘alf miljoen euro veur uut e trokkn maar det bleek in ’t kader van de bezunigingn toch vuus te veule, ze em ‘t ‘alveerd noa zeum en ‘alve ton. En in 2028 is d’r weer Seel, een skitterend evenement woar mee Kampen zich landeli’jk op de kaarte kan zettn. De gemeente ef de organisasie van Seel vieftigduzend euro e geum veur de bestendiging van ’t evenement. En now vroag ik mien of terwijl d’r veur de beide joarn een ‘ele kladde kostn e maakt muttn worrn, woarumme de gemeente niet ies noa giet denkn of ’t niet slim is um die beide evenementn in één joar aan mekare te knuppn.
Zol d’r ene kampenaar van wakker liggn det we ‘t acht ‘onderd joarig bestoan van Kampen saamt met Seel in 2028 goan viern in plaase van in 2027, veural aj doar merakels veule geld mee kunn bespaarn, wie ’t wet mag ’t zeggn.
Met grote belangstelling ‘eb ik ’t ver’aal in de krante e leest van de uutvinding van de kunstniere van dokter Kolff in Kampen, tachtig joar geleedn. Aj doar goed over noa denkn wat is Kampen dan toch soms op een rare meniere bezig. Ie em een bekende wereldburger in oe middn ‘ad en wat ei’j d’r ooit mee e doan als stadsbestuur, elemoale niks, de dokter zien levenswark stiet te verpietern in een boomkamertien in Myosotis, en ’t beeld van dokter Kolff stiet op een onoogli’jk plekkien op ’t uukien van de ‘Endrik van Vianden stroate achter een paar bankies, goa maar ies kiekn.
Wi’j em ’t aan de geweldige inzet van Herman Broers te dankn dat we ’t ver’aal en de geschiedenis kenn, want anders ‘adden we weinig of niks van dokter Kolff e weetn.
Ei’j ef de álve wereld van de nierpatientn inmiddels ’t leem e red met zien uutvinding. Oog tied det d’r mensen opstoan um Kampen ‘iermee op de kaarte te zettn. De focus lig op dit moment alleent maar op die kladde geld kostende olde Kogge als toekomstige toeristentrekker, maar ik denke daj met een mooie presentasie van dokter Kolff zien levenswark op een prominente plekke in de stad net zoveule zo niet meer toeristen noa Kampen áaln.
Ik wete niet oe ’t jullie vergiet, met vakansie goan is leuk ‘eur, maar weer thuus koom vin ik eigenli’jk nog vuule leuker, en als ik weer terug bin dan denk ik altied met plezier aan de laaste regel van ons Kamper Stedelied. “Aj weerumme van de reize ’t eerst de Ni’jetoorn zien dan klinkt gevulig deur oe ene mooie stad ie bin van mien”. Ik wense jullie allemoale een fijne vakansie toe, maar één ding is zeker Aj weer umme bin is d’r altied wel weer wat in disse stad.
Appien Floep
