’t Is maar wat in disse stad.
· leestijd 1 minuut AlgemeenZakt in de geute, wat de gemeente KHC an giet doen doar snap ik elemoale niks van, um doar een stroomverdeelstation van zo’n 30 bi’j 15 meter op de parkeer plaase neer te goan zettn, ‘oe kuj ‘t bedenkn En dan bi’j d’r nog niet want d’r kump ook nog een groot ‘ekke rond um ene dus ’t ele spul giet nog veule meer ruumte inneem.
Is d’r now nargens een andere plekke veur zo’n knoerd van een gebouw, volgens Enexis wel die em zelfs meerdere lokasies aan e draagn. Woarumme muj dan zo’n vereniging zo geweldig teegn ‘oe in ’t árnas jaagn, ik ád echt e dacht det de gemeente road een andere beslissing zol neem, maar nee ‘eur, ’t wordt en ‘t blef ’t parkeer terrein van KHC.
Ik éb mien al vake of e vroagd woarumme of ze ooit in ’t verleedn onze mooie unieke Hanzestad Campen met een K bin goan skriem, oorspronkeli’jk was ’t eeuwenlang “Campen”met een C, ik ‘eb nooit ’t antwoord kunn vinn. Ik kwam d’r eigenli’jk op ant noadenkn toen ik een keer in Culemburg was, die stad bin ze toch ook nooit met een K goan skriem.
’t Zol ‘eel mooi weezn aanstaande ze d’r in ’t kader van Kampen 800 joar ies een bietien andacht an zolln skenkn, gelukkig is ’t niet elemoale verdween, kiek noa ‘t appartementn gebouw an de darde Ebbingestroate doar stiet met grote letters op de veurgevel “CAMPEN” met een C. Campenaer koffie wordt e skreem met een C, Campen tegelwerken met een C, Slagerij van Campen op Zuid met een C, Biergilde van Campen met een C, café de stomme van Campen met een C, Stichting kadekraan Campen met een C, in de boomkarreke ‘angt een bord an de mure met de name van onze beroemde kunst skilder Hendrik Avercamp, de stomme van Campen met een C, en miskien bin d’r nog wel meer die ’t met een C skriem, ik eure ’t graag.
Zelfs de veurzitter van de tweedekamer, al kump ie dan uut Zwolle, éij iet Thom van Campen met een C.
D’r is al ies eerder de vroage e steld woarumme skrief ie Camping met een C en Kamperen met een K, wie ’t wet mag ’t zeggn.
Miskien bin d’r wel meer verenigingen instellingn of stichtingn die bereid bin um Kampen in ’t kader van 800 joar bestoan weer met een C te goan skriem, um zomaar ies een paar veurbeeldn te nuum, wie wet ‘t zol maar zo kunn, Camper Kogge, Camper ui’tdaagn, Campen 800 joar, Campen partners, De Veerman van Campen, en woar ’t zeker bi’j zol passn is Kerst in oud Campen, ik zol ’t in ieder geval ‘ardstikke mooi vinn, ik bin beni’jd óe jullie doar noa kiekn,
En zo ziej maar weer, d’r is altied wel wat in disse stad
Appien Floep
Spot jij iets dat niet klopt of heb je een aanvulling? Meld het via de links hieronder.
