’t Is maar wat in disse stad
· leestijd 1 minuut Algemeen
Zakt in de geute, ‘addn we zo’n mooie muurskildering bi’j ‘t olde stad’uus an de Oldestroate, maar die mos zo neudig weg, ik vroage mien of ze det bi’j ’t museum zomaar zelf kunn beslissn.
En dan ook nog zonder overleg met de kunstenaar, en zol ‘t college of de wet’older van cultuur íer zien goedkeuring wel an verleent em, of wist die d’r ook niks van, det wil ik eigenli’jk wel ies graag ‘eurn, want ‘oe dan ook, ’t is grote zunde van die negen duzend euro.
D’r is de laatste joarn nogal wat e skeum met de zoaterdagmarkt, eerst mossn ze ver’uuzn noa de Ni’jemarkt veur de uutbreiding van ‘t terras op de Plantage, det zaagn ze eigenli’jk niet zo zittn maar noa een posien waarn ze d’r toch wel bli’j mee ze ‘addn meer ruumte. Now stoan ze ti’jdelijk in ’t kalver’ekkenbos, umdet de Ni’jemarkt d’r uut lig, en ze bin bange det ze noa de herinrichting op de Ni’jemarkt de boel niet meer fesoenli’jk kwiet kunn. ’t Bevalt ze doar goed en doarumme willn ze d’r graag willn bliem stoan, maar det ziet de gemeente niet zittn.
’t Skient det d’r een dubbele trappe veur de muziek tente kump, en een terras op de ziet kante van de Stadsgehoorzaal. Miskien is een proef opstelling zinvol, maar als blek det ze d’r niet met zien alln in passn dan zal de gemeente toch wat muttn, dus loat ze dan maar mooi stoan in ’t Kalver’ekkenbos.
Want ‘oe dan ook die zoaterdagmarkt ef toch echt wel een functie in de stad.
’t Zal toch niet woar weezn, det “de Veerman” uut Kampen weg mut, Gemeente woar bi’j in vredesname mee bezig, en dan ook nog de man ‘t loatn vertellen deur twee ambtenaarn onangekondigd noar um toe te stuurn. Een prachtig schip wat al 20 joar an de Iesselkante lig, ’onderd procent bi’j Kampen ‘eurd, die mooie vaartochten maakt en geweldig veule mensen trekt. Wat is eigenli’jk de weerde van de slogan die jullie bedacht em “Kampen hartelijke Hanzestad”, pas maar op det ’t niet Kampen Hateli’jke Hanzestad wordt.
In Zwartsluus is ie vast van ‘arte welkom, is det wat jullie willn?
Ik wense jullie allemoale veur zovarre aj weg goan straks een ‘ele fijne vakansie toe, en ik ‘ope daj ’t een bietien met mien eens bin want veur mien is met vakansie goan mooi, maar terug koom is nog veule mooier want: An een slinger van de Iessel lig al eeuwen lang een stad woar ’t skiër is um te leven nog nooit iemand ’t land ef ‘ad, en aj weerumme van de reize ’t eerst de Ni’jetoorn zien dan klinkt gevuulig deur oe ene, “mooie stad ie bin van mien.”
En ’t mooie is, ie verveeln oe ‘ier nooit, want d’r is altied wel wat in disse stad.
Appien Floep.
