’t Is maar wat in disse stad
· leestijd 1 minuut AlgemeenZakt in de geute, ik ‘ad nog nooit van mien leem éurd van een “pumptrackbane” maar toen ik ’t veráal e leezn ad, toen kreeg ik toch wel een bietien begrip veur ’t pleidooi van Bart Weever en Dik Koster. Ik kan mien goed veurstelln det doar merakels veule belangstellig veur is onder een groot antal sportievelingn, en ‘t is alvast mooi meegeneum det wet’older van der Sluis enthausiast is, ei’j vindt ’t zelfs gaaf zeeg ie, opeli’jk denkt de road d’r net zo over en lop die d’r ook warm veur, want als ’t in Hasselt kan dan loat ie det toch als road niet over oe kante goan, dan mut det in Kampen toch zeker ook kunn.
En now is ander’alve ton best een kladde geld, maar met een bietien goeie wil met een bijdrage van de gemeente en een poging um via één of meerdere potties of via “Crowdfunding” (ik kan d’r ‘elaas gien dialectwoord veur bedenkn), dan mut ’t toch mogeli’jk weezn umdet te realiseern. Ie kunn de gemeente ook vroagn um ies iets minder geld uut te geem aan onderzuukn die in de onderste la verdwienn, denk doarbi’j an de Sportcampus, de martelgang van kromme Lindert zol wijlen old wet’older Arend Hengeveld zeggn. Boomdien em ze d’r al een plekkien veur in gedachtn, mooi toch, ik wense de initiatiefnemers alle succes.
Veurige moand eb ik in mien stukkien e skreem over de IEsselkogge, ik bin e vroagd deur iemand zonder een name te nuum um d’r nog een keer andacht an te willn skenkn en det doe ik met alle plezier. Veur al die genen die al joaren negatief e west bin, eerli’jk gezegd ik ‘ad ook mien twiefels, met name op ’t moment toen ’t van Heutzplein werd e nuumd als mogeli’jke locatie met die afschuweli’jke grote deuze die ze doar áddn in e tekent, maar ik bin umme. Want bekiek ’t now ook ies een keer van de positieve kante, en doar doe ik van ‘arte an mee. Uuteindeli’jk em wi’j onze mooie stad te dankn an ons rieke Hanzeverleedn, en wat ook nog speult Kampen ‘oeft ’t niet allemoale alleen te betaaln, Rijkswaterstaat en de Rijksdienst veur ‘t Cultureel Arfgoed em in al die joarn det ze d’r mee bezig bin ook behoorli’jk geld in de pot e doan. Ik denke als die Kogge straks als monument uut de middeleeuwen in volle glorie te bekiekn is dat we met zien alln toch bli’j bin det ’t Kampen gelukt is.
Pette of veur ’t Torenkoor en ’t Uienkoor, die em met een benefietconcert 2300 euro op ‘aald um det vervolgens te skenkn an twee lokale goeie doeln, de SAP (Stichting Aangepast Paardrijden) uut Kampen, en de SGPIJ (Stichting Gehandicapten Paardrijden IJsselmuiden).
En zo ziej maar weer, d’r is altied wel wat in disse stad
Appien Floep
