’t Is maar wat in disse stad
· leestijd 1 minuut AlgemeenZakt in de geute, zol ‘t er in de toekomst dan warkeli’jk van koom det ons unieke waterfront letterli’jk en figuurli’jk van de goeie kante in ’t zunnegien wordt e zet, als de diek bi’j ’t station wordt an e pakt.
De plann bin d’r in ieder geval, en ze kunn d’r echt een toeristische trekpleister van maakn. Want vanof die kante is ’t zicht op de stad ’t mooist en echt uniek.
’t plan twee wat de gemeente veurleg is wel arg mooi, kuj zittn genietn van ons prachtige stadsfront, nog mooier zol ’t weezn aj d’r op één of andere meniere ook een bakkien koffie kunn drinkn, beni’jd wat ’t giet worrn.
D’r is goed ni’js van de Historische vereniging “Jan van Arkel”, veurig joar twiefeldn ze over het voortbestoan van de Kamper Almanak, maar ze em an e kondigd dat ie dit joar toch weer verskient, enwel op wereldspaardag 31 oktober 2026. Boomdien goan ze zich inzettn um ‘m veur de toekomst veilig te stelln, ik ‘ope van ‘arte det ’t ze lukt.
Want ik blieve d’r bi’j det de Kamper Almanak, det historische boekwerk, net zo b’j Kampen ‘eurd als det de Ni’jetoorn bi’j kampen ‘eurd, ’t Eerste exemplaar is van 1928, dus det betekent dat de almanak over twee joar ‘onderd joar bestiet, en det is een feesien weerd, graag dan met de zeker’eid det ie blef bestoan.
En noast dit goeie ni’js is d’r ook weer een bericht woar aj van schrikkn, de organisatie is d’r vri’j dudeli’jk over det ’t onder ’t huidige beleid van de gemeente niet verantwoord is um in 2028 “Sail” te organiseern.
Ik begriepe nog steeds niet waorumme de gemeente zo weinig creatief is, d’r wordt een kladde geld uut e trokkn um volgend joar in 2027 ‘t 800 joarig bestoan van Kampen te viern, vier ’t een joar later in 2028 met Sail als uutgangspunt, en maak d’r gezamenli’jk een prachtig feest van, is det now zo muuili’jk.
Wat mien ook opvalt in ’t kader van de gemeenteroads verkiezingn op 18 maart wordt d’r deur alle liestetrekkers in de pers vri’j breed an e geum wat ‘un speerpuntn bin , maar ik eb nog weing eurd en e leezn over ’t in stand oaln van de grote evenementen, kom op ’t zol toch grote zunde weezn um det te loatn verdwienn.
D’r doen maar liefst 11 parti’jen in Kampen mee an de gemeenteroads verkiezingn op 18 maart, dus de keuze is reuze, en in die keuze bin we gelukkig allemole vri’j, maar weet wel det iedere stemme geldt en alles is beter dan thuus bliem.
Loatn we onze vri’j’eid ten opzichte van al die andere landn woar die vri’j’eid niet bestiet maar koesteren.
En zo ziej maar weer, d’r is altied wel wat in disse stad.
Appien Floep
