Leugenbankien: ’t Is maar wat in disse stad

Zakt in de geute, d’r is in sommige kringn wat reuring over ’t feit det d’r now veur de vijfde keer een bierfestival plaats e vunn ef in de Boomkarreke, en ik kan mien goed veurstelln dat ‘ier een aantal mensn wat muuite mee em. Want loatn we eerli’jk weezn: ’t is toch wel ampart daj zoiets organiseern in een karreke.

Maar an de andere kante: de Boomkarreke is ’t grootste monument in onze mooie Hanzestad, en um die in de been te oaln is d’r een kladde geld neudig. We kunn ’t ons toch echt niet veroorloovn um det prachtige monument te verwaarloozn.

En now ie niet meer gebruukt wordt veur de wekeli’jkse karkdiensten, muttn d’r veule activiteitn georganiseerd worrn die geld opbrengn um alle kostn te dekkn. D’r bestiet een club “de vrienden van de Boomkarreke”, en aj as rechtgeaarde Kampenaar trots bin op oe stad, dan is ’t de muuite weerd te overweegn um oe doar bi’j an te sluutn.

Wat is ’t toch een drama veur det gezin wat now al ander’alf joar min of meer op e sleutn zit in de Open Hof. Ik zol d’r normaal gespreukn ier in mien stukkien niet over beginn, maar ’t speult zich wel of in onze stad en ’t ef inmiddels landeli’jke bekend’eid e kreegn.

En wat mien zo zeer dut, det die kienders — die toch in weezn Nederlandse kienders bin, die ‘ier of geboorn bin of op e gruuid, ingeburgerd bin en noa skoole goan — de dupe worrn van het politieke onvermoogn van onze over’eid, die ier al joarn lang over proatn en maar niet tot een oplossing koom.

Ik beseffe merakels goed det ‘ier verskillend over e dacht wordt, en det mag natuurli’jk. Maar ik ‘ope van ‘arte det die mooie prijs die de Open Hof e kreegn ef de basis is veur CDA-minister “Bart van den Brink” um gebruuk te maakn van zien “discretionare bevoegdheid” — muuili’jk woord — um ‘ier eindeli’jk duudeli’jk’eid in te skeppn en die kienders ‘ier een toekomst te geem.

Ik ‘eb begreepn det ’t in Nederland op dit moment um ongeveer 420 kienders giet die noa ‘un skooltied waarski’jnli’jk op de Nederlandse arbeidsmarkt ‘ard neudig bin um alle oopn stoande vacatures in te vulln.

Em jullie ofgeloopn zundag ’t programma van Ivo Niehe e zien? Ei’j was op bezuuk in de veurmalige Joodse karreke an de Iesselkante. Doar is een biezundere exposisie te zien van Christie van der Haak, en aj d’r nog niet e west bin dan is ‘t echt de muuite weerd um d’r te goan kiekn. En zolange ze in ’t Gemeente museum in ’t olde stad’uus an de Oldestroate an ’t verbouwn bin, dan kuj veur niks noa de Synagoge. Wat wi’j nog meer.

En zo ziej maar weer: d’r is altied wel wat in disse stad.

Appien Floep